Çekia refuzon kërkesën e gjykatës për hetimin e kryeministrit për korrupsion
Parlamenti i Çekisë ka refuzuar kërkesën e gjykatës për të lejuar ndjekjen penale ndaj kryeministrit Andrej Babis, duke i garantuar atij imunitet parlamentar deri në fund të mandatit aktual në vitin 2029.
Vendimi u mor nga dhoma e ulët e parlamentit, ku deputetët e partisë populiste ANO të drejtuar nga Babis, së bashku me partnerët e koalicionit qeverisës, votuan kundër heqjes së imunitetit të tij. Në votim u bashkuan edhe deputetët e partisë së djathtë ekstreme SPD dhe lëvizjes “Motorists”, duke bllokuar kështu mundësinë që gjykata të vazhdojë procesin penal.
Çështja lidhet me një subvencion prej rreth 2 milionë eurosh nga fondet e Bashkimit Europian, i dhënë në vitin 2008 për ndërtimin e një hoteli dhe qendre konferencash pranë Pragës, të njohur si “Stork Nest”. Prokurorët pretendojnë se Babis fshehu pronësinë e kompanisë që përfitoi fondin për të përmbushur kriteret e programit, i cili ishte menduar për bizneset e vogla dhe jo për korporata të mëdha.
Babis i ka mohuar vazhdimisht akuzat, duke argumentuar se procesi është i motivuar politikisht dhe synon të dëmtojë aktivitetin e tij politik. Në një fjalim në parlament, ai deklaroi se partitë tradicionale e shohin si kërcënim sepse, sipas tij, “refuzon të vjedhë dhe nuk mund të korruptohet”.
Vitin e kaluar një gjykatë apeli rrëzoi vendimin e pafajësisë që ishte dhënë nga një gjykatë më e ulët dhe urdhëroi rigjykimin e çështjes. Megjithatë, votimi i parlamentit e bën të pamundur që gjykata të vazhdojë procesin gjatë mandatit aktual parlamentar.
Andrej Babis është një nga biznesmenët më të pasur në Europën Qendrore dhe ka ndërtuar një perandori biznesi me vlerë miliarda dollarë, që përfshin sektorët e bujqësisë, kimikateve, përpunimit të ushqimit, pasurive të paluajtshme dhe klinikave të fertilitetit në disa vende europiane.
Në të njëjtën seancë, parlamenti refuzoi edhe kërkesën për heqjen e imunitetit të aleatit të koalicionit qeverisës dhe kreut të SPD, Tomio Okamura, i cili përballet me akuza për gjuhë urrejtjeje. Okamura i ka cilësuar akuzat si një përpjekje për të kriminalizuar opozitën politike./Reuters
