Një tjetër Call Center ku kryeheshin mashtrime online është zbuluar në Tiranë.
Policia ka arrestuar dy administratorët e ambientit që ishte përshtatur si Call Center, Argest Rushi 44-vjec dhe Leonard Maksutaj 26-vjec, ndërkohë janë proceduar penalisht 12 persona të tjerë të cilët kanë qënë të punësuar fiktivisht dhe kryenin telefonata për investimet në bursa dhe kripomonedha, kryesisht jashtë vendit.
Call Centeri në fjalë ishte vendosur në një apartment në rrugën “Sulejman Delvina”. Mësohet se ky Call Center, kishte disa muaj që ishte aktiv, ndërsa apartamenti fillimisht ishte marrë me qira nga 44-vjecari Argest Rushi. Sipas policisë ai ka bashkëpunuar me Leonard Maksutajn, duke vendosur 19 kompjutera në apartamentin, që kishin marrë me qira dhe duke e kthyer në qëndër Call Center. Qytetarët e huaj kryesisht në Itali, Gjermani dhe vende të tjera të Bashkimit Europian, telefonoheshin duke I ftuar të investonin në bursa fiktive dhe duke iu premtuar fitime të majme, por në fakt të gjitha paratë e investuara nuk mund të tërhiqeshin mbrasht. Mësohet se shuma e përfituar nga mashtrimi në këtë call center arrin në disa qindra mijëra euro.
Gjatë momentit të ndërhyrjes policia ka mundur që të ndalojë në flagrancë të dy administratorët. Ndërkohë tashmë hetimi do të ndiqet nga Prokuroria e Tiranës për të zbuluar nëse ka persona të tjerë të përfshirë në këtë aktivitet criminal.
