Avokatët e Evis Berberit akrobaci për të shtyrë seancat
Gjykata e Posaçme ka dështuar gjatë katër seancave publike të fillojë gjykimin e çështjes penale ndaj Evis Berberit dhe 21 të pandehurve të tjerë, të akuzuar për korrupsion, shkelje të barazisë në tendera e pastrim parash. Seanca e parë e zhvilluar më datë 13 janar u shty për përsëritjen e njoftimeve për të pandehurit Gentian Gjyli dhe Erald Elezi, ndërsa tre seancat e tjera të datave 21 janar, 9 shkurt dhe 16 shkurt, janë shtyrë për shkak të mosparaqitjes së avokatëve mbrojtës.
Një prej të tre të ndaluarve për këtë çështje, Ervis Lami i kërkoi gjykatës ndarjen e çështjes. Edhe avokati i tij kërkoi veçimin e çështjes dhe vijimin e procesit. Ai vërejti se është e përsëritur se mungojnë avokatët e të pandehurve që janë nën hetim në gjendje të lirë.
Prokurori Dritan Prençi i cilësoi joligjore arsyet e paraqitura nga mbrojtësit për mungesën e tyre. Ai vërejti se procesi po zvarritet nga avokatët e të pandehurve. Në vijim, Prençi kërkoiqë gjykata të marrë masa dhe të penalizojë avokatët që bëhen shkak për shtyrjen e seancave, si dhe të pezullohen afatet e paraburgimit.
Por, mbrojtësi i Berberit, avokati Gentian Romano i kërkoi gjykatës të mos pranojë kërkesën e prokurorit për penalizimin e kolegëve të tij, duke argumentuar se ishte hera e parë që ata mungonin, si dhe se kishin paraqitur arsye.
Pasi u tërhoq, gjykata vendosi shtyrjen e seancës për të katërtën herë dhe caktoi avokatë kryesisht për të pandehurit që kishin mbetur pa mbrotje. Kërkesa e të pandehurit Lami për veçimin e çështjes u rrëzua si e pabazuar në këtë moment procedural. Po ashtu, gjykata pezulloi afatet e paraburgimit të tre të pandehurve që janë nën masën e sigurisë “Arrest në burg”.
SPAK e dërgoi për gjykim çështjen penale ndaj Berberit e 21 të pandehurve të tjerë në dhjetor të vitit të kaluar. Nga hetimi janë evidentuar fakte penale në shtatë procedura prokurimi, të zhvilluara në vitet 2020-2022, në Agjencinë për Eficencën e Energjisë dhe Autoritetin Rrugor Shqiptar, gjatë kohës kur titullar i autoritetit kontraktor ka qenë i pandehuri Evis Berberi. Ndërsa në një procedure prokurimi, i pandehuri Evis Berberi ka qenë kryetar i komisionit të vlerësimit të ofertave. Tetë procedura prokurorimi që janë hetuar nga SPAK rezulton që së bashku, të kenë pasur fonde me vlerë totale prej rreth 526 milionë lekëve.
Nga hetimi ka rezultuar se tenderat janë fituar nga kompania Net – Group sh.p.k., në zotërim të të pandehurit Valter Begajt dhe përfitimet monetare janë përfituar nga Berberi në mënyrë të tërthortë përmes shoqërisë DAAM sh.p.k., që dyshohet se kontrollohet prej tij.
Prokuroria konkludon se Evis Berberi është pronar de facto i shoqërisë DAAM sh.p.k. dhe për të fshehur gjurmët e pronësisë së kësaj shoqërie, në vitin 2019 e ka kaluar fiktivisht pronësinë tek të pandehurit Brunilda Buli, Valter Begaj dhe Ervis Lami.
Veç korrupsionit, në këto procedura tenderimi janë evidentuar fakte për veprën penale të shkeljes së barazisë së pjesëmarrësve në tendera apo ankande publike, në lidhje me veprimet e kundraligjshme të anëtarëve të komisionit të përllogaritjes së fondit limit, njësisë së prokurimit dhe komisionit të vlerësimit të ofertave. Këto veprime të paligjshme janë kryer në lidhje me përllogaritjen e fondit limit, hartimin e dokumenteve standarde të tenderit, si dhe për vlerësimin dhe shpalljen fitues të shoqërisë Net Group sh.p.k, në kundërshtim me kriteret e përcaktuara në dokumentet standarde të tenderit, duke e favorizuar atë në shtatë raste.
Në këto procedura prokurimi, Berberi akuzohet se ka vepruar në bashkëpunim me zyrtarët e tjerë, të pandehurit Gentjan Gjyli, Erald Elezi, Artan Leskoviku, Altin Marko, Bledar Aliaj, Blerta Musabelli, Kamelia Tafaj, Ela Goxhaj, Jetmira Dervishi, Orjon Islamaj, Adrian Kroi, Genti Raça, Adela Kica, Denis Xhoxhi, Gëzim Noni, Adja Strazimiri, Shkëlqim Lusha dhe Valbona Pepa.
Berberi është nën hetim nga SPAK edhe për çështje të tjera penale që kanë të bëjnë me abuzime të fondeve publike.
