Avni Ponari iu bën gropën japonezëve, i fton të investojnë te Durana Tech Park në hetim nga SPAK
Durana Tech Park, parku inekzistent fizikisht për bizneset e teknologjisë së informacionit, por i denjë për megaskemën e evazionit fiskal. Nga dyert e Prokurorisë së Posaçme, ku po hetohet si aferë, ka zënë vend në oborrin e ambasadës japoneze. Ka qenë Konsulli i Nderit i Japonisë në Vlorë, por me seli dhe aktivitet në Tiranë, z. Avni Ponari, që i ka hapur dyert parkut inekzistent për t’u prezantuar investitorëve japonezë si një model i vlefshëm për investime.
Është faqja zyrtare e Durana Tech Park që prezanton pjesëmarrjen në këtë forum të Dhomës së Tregtisë Shqipëri-Japoni, ku organizator është edhe z. Ponari, njëherazi pronari i Sigal Uniqa.
Por se çfarë risie mund t’u prezantosh japonezëve për një park që ekziston ferra e shkurre, këtë ndoshta duhet ta dinë z. Ponari dhe pjesëmarrësit. Pasi prej muajsh tashmë është publike afera me këtë park inekzistent. Ai është përdorur nga disa kompani të lidhura me skandalin AKSHI e jo vetëm për evazion e mospagim taksash.
Aq sa edhe deputeti z. Tedi Blushi, veç medias, e ka denoncuar publikisht situatën surreale të parkut në letra e në realitet fushë me bar.Kjo situatë ka detyruar ligjvënësin të amendojë ligjin, duke i hapur rrugën parkut të funksionojë jo vetëm fizikisht, siç thuhet në letra, por tani edhe virtualisht.
Disa ng shkrimet nê media që promovojnë arritjet e Forumit
Forumi i Dytë i Dhomës së Tregtisë dhe Industrisë Shqipëri–Japoni u zhvillua këtë të mërkurë në Tiranë, duke vënë në fokus mbështetjen dhe nxitjen e investimeve japoneze në Shqipëri.
Në fjalën e hapjes, organizatori i forumit dhe njëherësh presidenti i Dhomës Shqiptaro-Japoneze, z. Avni Ponari, theksoi se interesi i sipërmarrësve japonezë për Shqipërinë është konkret dhe në rritje, duke konsideruar forumin si platforma ideale për kthimin e ideve të biznesit në aksione konkrete për të dy vendet.
Ministrja e Ekonomisë dhe Inovacionit, Delina Ibrahimi, nënvizoi potencialin e Shqipërisë si portë për investimet japoneze drejt rajonit dhe Evropës, duke shtuar se integrimi në BE rrit standardet dhe tërheq investitorë seriozë. Kryetarja e komisionit parlamentar të ekonomisë, Milva Ekonomi, shprehu mbështetjen parlamentare për forcimin e bashkëpunimit dypalësh.
Ambasadorja Kikuko Kato vlerësoi punën e Dhomës dhe konfirmoi mbështetjen e Japonisë për integrimin e Shqipërisë në BE, duke e konsideruar vendin një portë të rëndësishme për investimet japoneze.
Përfaqësuesi i JETRO, Manuel Kaneko, vuri theksin te tre fjalët kyçe: ndërlidhje (connectivity), qartësi (clarity) dhe vazhdimësi (continuity), ndërsa përfaqësuesja e AIDA-s, Sara Zotaj, dhe drejtuesja e Korporatës Shqiptare të Investimeve, Elira Kokona, prezantuan mundësitë për bashkëpunim dhe lehtësira institucionale. Në sesionin e dytë, te këto mundësi dhe lehtësira, më të detajuara, u sollën edhe prezantimet e përfaqësuesve dhe drejtuesve të Departamenti i Kërkimit në Bankë të Shqipërisë, TEDA Tirana, ASDRE, Durana Tech Park, drejtoria për Integrim, Planifikim Strategjik dhe Zhvillim Ekonomik në bashkinë e Tiranës dhe Agjencisë Kombëtare e Turizmit.
Diskutimet u zhvilluan në tre sesione, duke përfshirë mundësitë konkrete të investimeve japoneze dhe histori suksesi të produkteve japoneze në tregun shqiptar. Forumin e përshëndetën nërpërmjet videomesazheve edhe presidenti i Dhomës së Tregtisë dhe Industrisë së qytetit të Çibas dhe Konsulli i Nderit të Shqipërisë në Çiba, z. Hidetoshi Sakuma dhe z. Kjoko Spektor.
Në mbyllje, z. Ponari konfirmoi angazhimin e Dhomës për ndërtimin e një tradite të qëndrueshme dialogu dhe investimesh.
