Alarm mjedisor: Mbetjet e KURUM përçajnë Agjencinë Kombëtare të Mjedisit
Skandali i mbetjeve të rrezikshme të KURUM ka shkaktuar përplasje të forta brenda Agjencisë Kombëtare të Mjedisit (AKM). Më datë 27 janar, Marjeta Përlala, drejtoreshë e Përgjithshme e AKM-së, delegoi kompetencat tek e besuara e saj, Elona Uzmutlu, në një lëvizje që duket e lidhur me shqetësimin për ecurinë e hetimeve.
Megjithatë, Uzmutlu ende nuk kishte hyrë në zyrën e drejtoreshës, kur Ministri i Mjedisit, Sofjan Jaupaj, nxori një urdhër të ri, duke ia deleguar kompetencat e Drejtorit të Përgjithshëm të AKM-së të besuarit të tij, Athanas Karaja.
Me gjasë, zhvillimet e reja për çështjen e mbetjeve të KURUM pritet të sjellin edhe një pasqyrë të re në Agjencinë Kombëtare të Mjedisit, ku interesat e ministrit të ri dhe të drejtuesve të këtij institucioni qartësisht kanë nisur të përplasen, ashtu siç ndodhi në Bashkinë e Tiranës me largimin e Erion Veliajt. Orët në vazhdim do të tregojnë më qartë se cila do të jetë panorama në atë që pritet të ndodhë me një nga çështjet më të nxehta dhe më pak të prekura nga shtypi: atë të mbetjeve të konsideruara të rrezikshme të KURUM, të transportuara nga porti i Durrësit, përfshirë edhe përgjegjësinë e drejtuesve të kompanisë dhe institucioneve shqiptare në këtë proces.
Më poshtë urdhri zyrtar, sipas të cilit Karaja do të ushtrojë detyrën e Drejtorit të Përgjithshëm të Agjencisë Kombëtare të Mjedisit deri në një urdhër të dytë.
⸻
DELEGIM I KOMPETENCAVE TË DREJTORIT TË PËRGJITHSHËM TË
AGJENCISË KOMBËTARE TË MJEDISIT
Në mbështetje të nenit 102, pika 4, të Kushtetutës së Republikës së Shqipërisë, të ligjit nr. 44/2015 “Kodi i Procedurave Administrative i Republikës së Shqipërisë”, të ligjit nr. 90/2012 “Për organizimin dhe funksionimin e administratës shtetërore”, të Vendimit të Këshillit të Ministrave nr. 513, datë 25.09.2025 “Për përcaktimin e fushës së përgjegjësisë shtetërore të Ministrisë së Mjedisit”, referuar shkresës nr. 2118/2, datë 28.01.2026, protokolluar në Ministrinë e Mjedisit me nr. 636 prot., datë 28.01.2026, lënda “Për dijeni”,
URDHËROJ:
1. Z. Athanas Karaja, Drejtor i Përgjithshëm në Drejtorinë e Përgjithshme Rregullatore dhe Përputhshmërisë, në Ministrinë e Mjedisit, që krahas detyrave aktuale, të kryejë edhe detyrat e Drejtorit të Përgjithshëm të Agjencisë Kombëtare të Mjedisit (AKM).
2. Z. Karaja do të ushtrojë detyrat shtesë, duke filluar nga data 29.01.2026, deri në shfuqizimin e këtij urdhri.
3. Ngarkohet Drejtoria e Burimeve Njerëzore, Aseteve dhe Shërbimeve në Ministrinë e Mjedisit, Drejtoria e Financës dhe Shërbimeve Mbështetëse në Agjencinë Kombëtare të Mjedisit, si dhe të gjitha strukturat e AKM-së, për ndjekjen dhe zbatimin e këtij Urdhri.
Ky Urdhër hyn në fuqi menjëherë.
