AKSHI djeg edhe Elision Jorgji e AlbScan! I sekuestrohen 1 milion euro
Prokuroria e Posaçme njoftoi mbrëmjen e sotme për sekuestrimin e të paktën 52 pasuri me vlerë të përbashkët 40 milionë euro, që i përkasin personave nën hetim në dosjen e “AKSHI-it”. Mes pasurive të sekuestruara përfshihen apartamente, truall, pyje, ndërtesa, vila, automjete luksoze, një jaht, si dhe llogari bankare dhe aksione në disa subjekte tregtare.
Elision Jorgjit, SPAK i ka sekuestruar 100,840,264 lekë në subjektin “AlbaScan”.
Me numrin më të lartë të pasurive të sekuestruara nga SPAK rezulton Ergys Agasi, me 27 pasuri të paluajtshme, subjektin “EA Solution”, një automjet luksoz dhe disa llogari bankare. Vetë Agasi ndodhet në kërkim nga Prokuroria e Posaçme prej disa muajsh.
Biznesmenit Ermal Beqiraj, i cili po ashtu është në kërkim, i janë sekuestruar nga SPAK 5 pasuri të paluajsthme si dhe: mjet lundrues Yacht “Skyfall”; subjektet “Soft & Solutions” sh.p.k dhe “H” sh.p.k.; biznes në rrugën “Çerçiz Topulli” dhe automjete e motomjete. Biznesmeni e ka vendosur jahtin ‘Predator 50 Skyfall’ me vlerë afro 1 milion euro në pronësi të Xhenila Tamizit, punonjëse e kompanisë “Soft & Solutions”. Në sy bien edhe trualli në resortin “Green Coast” dhe vila luksoze në “Rolling Hills”.
Në mesin e pasurive të sekuestruara janë edhe 5 pasuri të paluajtshme (përfshirë një apartament 73 metër katror), një makinë tip Volksëagen dhe disa llogari bankare të ish-drejtoreshës së AKSHI-t, Mirlinda Karçanaj, e cila në fakt rezulton me numrin më të vogël dhe vlerën më të ulët të pasurive të sekuestruara dhe krahasuar me pasuritë që i janë sekuestruar personave të tjerë nën hetim.
Kujtojmë që për dosjen e AKSHI-t janë shpallur në kërkim biznesmenët Ergys Agasi dhe Ermal Beqiri. Sipas SPAK, Karçanaj ka kryer veprën penale “shkelje e barazisë së pjesëmarrëve në tendera dhe ankande publike” në kuadër te grupit të strukturuar kriminal.
Gëzim Hoxhës i janë sekuestruar nga SPAK në llogari bankare 123,629,664 lekë në subjektin “F” sh.p.k., ndërsa Andis Papës 410,595,663 lekë në subjektin “FASTECH shpk” dhe 94,423,883 lekë në subjektin “FASTECH shpk”.