Pas deklaratave të presidentit amerikan Donald Trump për aneksimin e Groenlandës, ka reaguar edhe Berlini.
Qeveria e kancelarit Friedrich Merz ka dalë në mbrojtje të Danimarkës, duke kërkuar respektimin e ligjeve ndërkombëtare.
Sebastian Hille, zëdhënësi i kancelarit Merz, sqaroi pozicionin e Gjermanisë gjatë një konference për shtyp.
Ai tha se Gjermania e njeh ishullin si një administratë autonome që është pjesë e Mbretërisë së Danimarkës. Zëdhënësi theksoi se kufijtë nuk mund të zhvendosen me dhunë dhe asnjë territor nuk mund të merret në mënyrë të detyruar.
“Berlini zyrtar mbështetet plotësisht te Karta e OKB-së dhe parimet e së drejtës ndërkombëtare”, tha ai.
Gjermania konfirmoi se është në kontakt të ngushtë me partnerët danezë dhe ata evropianë për të monitoruar situatën dhe për të ruajtur stabilitetin e kufijve në Evropë.
Edhe kryeministri britanik, Keir Starmer, ka shprehur mbështetjen e plotë të Londrës për Danimarkën, në përgjigje të pretendimeve të presidentit amerikan, Donald Trump, mbi sovranitetin e Groenlandës.
I pyetur nga Sky News UK në margjinat e një vizite në qarkun anglez Berkshire, lidhur me deklaratat e ashpra të kryeministres daneze Mette Frederiksen ndaj Trump, Starmer ka marrë një qëndrim të qartë dhe të pazakontë publik kundër presidentit amerikan.
“Jam në anën e saj. Frederiksen ka të drejtë për të ardhmen e Groenlandës”, deklaroi Starmer, duke riafirmuar se Mbretëria e Bashkuar mbështet pozicionin e Danimarkës mbi statusin dhe sovranitetin e territorit autonom.
Ky qëndrim duket se sinjalizon një distancim të rrallë të hapur të Londrës nga Uashingtoni në një çështje të ndjeshme gjeopolitike, duke nënvizuar rëndësinë e respektimit të sovranitetit dhe rendit ndërkombëtar.
Administrata e Presidentit amerikan ka në plan ta vendosë Groenlandën në autoritetin e Komandës Veriore të Shteteve të Bashkuara, e cila është përgjegjëse për mbrojtjen e territorit të SHBA.
Groenlanda, pjesë e NATO-s ka një rëndësi strategjike për ushtrinë amerikane dhe për sistemin e saj të paralajmërimit të hershëm të raketave balistike, pasi rruga më e shkurtër nga Evropa në Amerikën e Veriut kalon përmes ishullit Arktik.
Edhe Bashkimi Evropian ka reaguar zyrtarisht pas deklaratave të Presidentit të SHBA-ve, Donald Trump, lidhur me mundësinë e aneksimit të Grenlandës.
Përmes një komunikate për mediat, Komisioni Evropian u rreshtua krah Danimarkës, duke theksuar se kufijtë e shteteve anëtare janë të paprekshëm.