Një konflikt i ashpër ka shpërthyer në Komisionin e Prokurimit Publik (KPP) lidhur me tenderin e fundit të shpallur nga Agjencia Kombëtare e Shoqërisë së Informacionit (AKSHI), me vlerë rreth 2.6 milionë euro, për ndërtimin e platformës kombëtare ACRIS (Albanian Current Research Information System).
Ankesat e kompanisë INTECH+ në KPP
Sipas burimeve të Skyweb.al, kompania INTECH+, në pronësi të Sokol Sinanit – i njohur si ortak i ish-ministrit Ilir Beqaj dhe përfitues i shumë tenderëve në sektorin e teknologjisë së informacionit – ka dorëzuar një ankesë zyrtare në KPP.
Në ankesë, Sinani ngre si shqetësim kryesor mungesën e kodit CPV, të cilin e konsideron si një kufizim të drejtpërdrejtë të konkurrencës:
“Mospërcaktimi i kodit CPV bën që operatorët ekonomikë të kufizohen dhe të mos marrin pjesë në këtë procedurë. Kjo sjell dyshime të arsyeshme se autoriteti kontraktor ka synuar të kufizojë konkurrencën artificialisht, në kundërshtim me parimet e prokurimit publik.”
Po ashtu, ai kritikon edhe një kriter tjetër të vendosur nga AKSHI: detyrimi që punonjësit e kompanive pjesëmarrëse të kenë figuruar në listë-pagesa për të paktën tre muaj para dorëzimit të ofertës. Sipas tij, ky kusht përdoret shpesh për të eliminuar konkurrencën reale.
Përplasje mes kompanive të IT dhe rikthimi i Gerond Meçes
Tensionet në tenderët e AKSHI janë rritur pas rikthimit të Gerond Meçes të kompanisë Advanced Business Solution, i cili për rreth dy vite ishte tërhequr nga tregu, për shkak të disa hetimeve dhe përgjimeve. Nga ana tjetër, konflikti është intensifikuar edhe në krahun e Ermal Beqirit, tashmë nën hetim nga SPAK.
Vetë Sokol Sinani, përveç INTECH+, është gjithashtu pronar i kompanisë Dat Log, një tjetër fituese e rëndësishme e tenderëve të AKSHI, shpesh në bashkëpunim me Meçen.
Detajet e tenderit për platformën ACRIS
Tenderi i AKSHI parashikon ndërtimin e një platforme kombëtare elektronike për menaxhimin e titujve akademikë, gradave shkencore, revistave dhe projekteve kërkimore të financuara në Shqipëri.
• Vlera totale: 2.6 milionë euro
• Implementimi: 166.6 milionë lekë
• Mirëmbajtja: 83.3 milionë lekë
• Afati i implementimit: 9 muaj
• Afati i mirëmbajtjes: 24 muaj
Ky tender është bërë një prej më të debatueshmëve të fundit viteve, duke rritur tensionet mes kompanive të teknologjisë së informacionit dhe duke sjellë akuza për paracaktim të fituesve dhe mungesë transparence në proceset e prokurimit publik./SkyWeb