Një megaoperacion i SPAK, në bashkëpunim me Europol dhe agjenci të tjera ligjzbatuese europiane, ka goditur një organizatë kriminale shqiptare të trafikut të drogës që drejtohej nga Franc Çopja (alias Franc Gergely) dhe Ervis Çela. Ky grup kriminal diktonte çmimin e kokainës në Evropë dhe transportonte sasi të mëdha euro cash drejt Shqipërisë.
Sipas dosjes së SPAK prej 282 faqesh, e siguruar nga VNA anëtarët e organizatës transportonin paratë nga Amerika Latine në Evropë, ku Franc Çopja menaxhonte pritjen e drogës dhe akumulimin e parave, ndërsa Ervis Çela kujdesej për dërgimin dhe fshehjen e eurove në Shqipëri.
Në komunikimet e zbuluara nga aplikacioni i koduar Sky ECC, janë evidentuar biseda ku flitet për mënyrat e fshehjes së parave, përfshirë groposjen e tyre poshtë rrënjëve të ullinjve.
Në një bisedë të 12 Dhjetorit 2020, Ervis Çela i shkruan Franc Çopjas:
Ervis Çela: “Kam 200 ullinj në mal duhet fut naj qyp atyre. Se ullijt rrojnë shumë.”
Franc Çopja: “Aahaha…kthej flori. Mos fut lek n tokë. Më dëgjo mu…”
Ervis Çela: “S’ka flori…Duhet me grabit naj bank..Duhet me porosit nga Afrika…”
Franc Çopja: “E di që ska..Do flas un ktu me njanin mos na i sajo ky…Po mblidhi avash avash…Por mos fut lek n tok… Se t prishen..”
Ervis Çela: “E di që prishen lekët.”
Në një tjetër bisedë më 13 Dhjetor 2020, Ervis Çela komunikon me vëllain e tij Ardjan Çela, ku diskutojnë për gropat ku do të fshihen paratë:
Ervis Çela: “Marove tu bo gropa?”
Ardjan Çela: “Tani po mbaroj duke i përgatit..filloj dhe shiu tani…”
Ervis Çela: “Do ja kalosh lales?”
Ardjan Çela: “Po të mbaroj fuçin dhe të shkoj ti mbyll…Ahahaha…”
Ervis Çela: “Ahahaha…i bone 10?”
Ardjan Çela: “Lala ka më shumë…Po”
Ervis Çela: “Të nis dhe 4/5M ktë javë që vjen…Ahahaha…”
Ardjan Çela: “Flasim më vonë…”
Më 14 Dhjetor 2020, Ervis Çela i shkruan vëllait tjetër, Riza Çela, se ka akumuluar mbi 100 milionë euro. Në shkurt 2021, në një bisedë me Franc Çopjan, ai shprehet:
Ervis Çela: “Nuk dijm ku me çu lekët.”
Franc Çopja: “20/30 kile çdo dit..Bani 1000 kile flori…”
Ervis Çela: “Po merr nja 200/300 kile për mu..”
Franc Çopja: “Ësht me 55 tani..Un vet kam arrit ke 100 kile deri tani…”
Në operacion u arrestuan 10 persona, ndërsa 6 të tjerë janë shpallur në kërkim. GJKKO konfirmoi masën “arrest në burg” për Ervis Çelën dhe 6 të tjerë. Franc Çopja ishte arrestuar më parë në Belgjikë.
