Vëzhgimi/ Nga ESP Oil në mes të Bllokut, Bolv Oil, Veliaj Petrol e Eida! Sa të sigurta janë karburantet?
922 stacione për karburante dhe 664 stacione për tregtimin e gazit të lëngshëm ushtrojnë veprimtarinë e tregtimit të shitjes me pakicë të karburanteve në Shqipëri.
116 prej tyre janë vetëm në Tiranë, disa prej të cilëve janë bërë shpesh objekt i incidenteve që kanë vënë në rrezik jetën e banorëve.
Do mbyll shteti gojën apo do mbyllet karburant EIDA i Frident Kuqit, pas skandalit të zjarrit?!
Pikat ku tregtohen lëndët e rrezikshme si nafta, benzina e gazi ndodhen rrëze pallateve, shpesh ngjitur me katet e para dhe në trotuare me shumë levizje. Por sa të rrezikshme jane ato për jetën e qytetarëve?
Kjo pikë karburanti te rruga Bardhyl ndodhet në trotuar. Qytetarët lëvizin aty edhe në momentet kur janë duke u furnizuar automjete, në pamundësi të një hapësirë tjetër alternative për të ecur.
E njëjta situatë është edhe në këtë pikë karburanti tek rruga “Hoxha Tahsim” pranë pazarit të ri. Automjetetet qëndrojnë për t’u furnizuar në trotuarin që ka shumë lëvizje në çdo moment të ditës.
Edhe në zonën e ish bllokut, ky karburant ndodhet në mes të disa pallateve.
Stacione të tilla janë të shumta në çdo zonë të Tiranës, kryesisht në nyjet e rrugëve kryesore nga qendra në periferi.
Tv Klan u interesua pranë Inspektoriatit shtetëror teknik dhe Industrial, ISHTI, në lidhje me kushtet e tregtimit të karburanteve, i cili në një përgjigje standarde tha se këto pika kanë detyrim të respektojnë kriteret e sigurisë.
“Tregtimi me pakicë i karburanteve dhe gazit të lëngëzuar nga nafta kryhet nga subjektet duke respektuar normat e kushtet teknike dhe masat për mbrojtjen nga zjarri. Stacionet e shitjes me pakicë të karburanteve si çdo subjekt që kryen veprimtari në fushën e hidrokarbureve, inspektohen nga ISHTI në zbatim të ligjit “Për inspektimin në Republikën e Shqipërisë dhe Programeve vjetore e mujore të miratuara”, thuhet në njoftimin e Inspektoriatit shtetëror teknik dhe industrial.
Sipas një vendimi të këshillit të ministrave të vitit 2014 pikat e karburantit në qytet duhet të plotësojnë kriterin e distancës prej 30 metrash nga pompa deri tek banesa më e afërt. ISHTI nuk iu përgjigj kërkesës së televizionit Klan nëse këto pika i respektojnë këto distanca.
Ndonëse është ngritur vazhdimisht si shqetësim dhe në pikat e karburanteve ka pasur herë pas herë incidente me shpërthime dhe të lënduar edhe në njerëz, duket se ky kriter ende nuk ka gjetur zbatim, ndërsa institucionet kujtohen për sigurinë vetëm pasi ndodhin incidente të rënda.
