“Vijnë nga Afrika, paketohen në Shqipëri…”, Ahmetaj: Ermal Nufi i përfshirë në trafik armësh

Ish-zv/kryeministri Arben Ahmetaj denoncon se Ministri i Mbrojtjes, Ermal Nufi, është i përfshirë në trafikim armësh.

Në një intervistë për “Çim Peka Live”, Ahmetaj komentoi edhe pseudonimin e Nufit, të cilit ia ka vëën ‘Ermal Raketa’ dhe ndau një episod nga komunikimet në Forcat e Armatosura.

“Ermal Raketa, që atë ditë ka qenë zëvendëssekretar i përgjithshëm, që u bë kryetar i bordit të KAYOs, u bë ministër i Mbrojtjes. E mbani mend që zoti Peka, në intervistën e fundit, kam thënë që është ndërruar komandanti i forcave tokësore me qëllim. Tani do shohim transfertat, paratë e shqiptarëve si u shkojnë miqve, klientëve dhe kreut të organizatës. Unë brenda grupit parlamentar të Partisë Socialiste shoh që nuk ndjehet njeri për plaçkitësen, votojnë këtë ligj kriminal për të vënë duart në kokë. Ermal Raketa është pseudonimi që Forcat e Armatosura i referohen ministrit të tyre. Nga brenda më ka ardhur. Kur kreu i organizatës i ka thënë: ‘Ermal, ti po më zhgënjen’, Ermali çohet në këmbë dhe i thotë: ‘Unë për ty bëj dhe raketë!’. E firmos. Dhe Forcat e Armatosura tash kanë filluar i thonë Ermal Raketa,” tha Ahmetaj.

Ahmetaj denoncon se pas disa projekteve dhe kompanive në Shqipëri fshihet një skemë e trafikut ndërkombëtar të armëve.

Ahmetaj tha se disponon informacione dhe materiale që, sipas tij, lidhen me një strukturë të organizuar për trafikimin e armëve, duke pretenduar se armët vijnë nga vende të Afrikës, paketohen në Shqipëri dhe më pas dërgohen drejt destinacioneve të tjera.

Ai përmendi edhe kompaninë Advanced Arms Technology, për të cilën tha se merret me prodhimin e armëve, duke lidhur emrin e Ron Yeffetit me këtë aktivitet.

Ahmetaj ngriti pikëpyetje edhe mbi rolin e ministrit të Mbrojtjes, të cilin e përmendi me nofkën “Ermal Raketa”, duke kërkuar që të bëhet publike se çfarë lloj armësh prodhohen apo paketohen në Shqipëri dhe nga vijnë ato.

“Tani, episodi i dytë shpjegon strukturën, vetë Roni. I thotë: ‘Do ketë një kompani shtetërore mburojë’. Dhe abuzon, përveç strukturës kriminale për devijimin e pasurive të shqiptarëve, abuzon me respektin e shqiptarëve për SHBA-në. Thotë: ‘Do krijojmë një trust në Amerikë që t’i mbyllim gojën ambasadës amerikane’. Ky ustai që do grabiste Delvinën, po do marrim thotë edhe Vlorën, TEC-in e Vlorës. Strukturë purifike kriminale për të grabitur Shqipërinë.

I ka dhënë këtij 2.1 milionë metra katrorë tokë pronë e shtetit nëpërmjet ligjit të investimeve strategjike. Ligji i investimeve strategjike duhet të abrogohet dje. Kjo gjë vjen nga pseudo-antikorrupsionistët brenda grupit. Është vetëshpjeguese. Jemi duke folur për trafik ndërkombëtar armësh, jo në kuadër të marrëveshjes së NATO-s që ka Shqipëria me Ukrainën. Jemi duke folur për trafik armësh nga vendet e Afrikës që paketohen në Shqipëri dhe marrin rrugën.

Kemi shoqërinë Advanced Arms Technology, e cila prodhon armë. Pra, Roni, i borxhit, i KAYOs, i TEC-it të Vlorës, i rezervës së naftës, do të bëjë trafik armësh.

Ermal Raketa ka detyrim t’u tregojë shqiptarëve çfarë armësh? Kush i prodhon? Nga kanë ardhur? Zoti Raketa thotë që përdoren në zona konflikti aktuale. Kjo është gafë penale, nxjerr sekretin dhe tregon trafikun e armëve të fshehur pas koncesioneve kriminale. Flasim trafik të pastër armësh, që paketohen në Shqipëri, dhe dërgohen në Afrikë. Ermal raketa duhet të thotë se çfarë armësh paketohen në Shqipëri. Roni i Bordit, i ambasadës, i Kayo-s, i rezervave të naftës se do t;ia japë Ronit kreu i organizatës. Mungesa e frikës ndaj ligjit është e frikshme. Dhe bën këtë stilin që u thotë deputetëve dhe e deklaron transparence këtë gjë në shëndetësi që do të bëjnë me izraelitët. Ai do që të kontrollojë çdo qeveri që do të vijë nesër. Do të duhet të merret me arteriet e organizatës së kreut të bandës. Shiheni pak rastin kur në Itali është kapur një furgon me raketa, shikojeni pak se mund të zbuloni gjëra interesante. Shiheni se nuk është pa gjë. Këtë informacion kam, e ndaj me shqiptarët. Mund të kenë lidhje. Disa raketa janë kapur në jug të Italisë.”, tha Ahmetaj.