Ndryshojnë rregullat në Policinë e Shtetit: Gradat do të merren më shpejt

Ndryshime e reja të miratuara në ligjin për Policinë e Shtetit kanë prekur edhe sistemin e gradave, një proces i diskutuar shumëherë në radhët e uniformave blu.

Tashmë, oficerët e policisë për të marrë gradat do duhet të presin më pak në kohë. Afati për kalimin nga “komisar” në “kryekomisar” dhe më tej në “drejtues” është ulur nga 5 në 4 vite, me argumentin se punonjësit që japin rezultate nuk duhet të presin gjatë vetëm për shkak të procedurave formale, duke vendosur më shumë fokus tek performanca në punë.

Po ashtu, drejtori i Përgjithshëm i Policisë tashmë ka të drejtën të japë ngritje në gradë edhe para afatit, në raste të veçanta. Në shenjë vlerësimi për akte heroike, sakrifica apo rrezikshmëri të lartë të ndërmarrë në shërbim të rendit dhe luftës kundër krimit, kryepolici mund të shpërblejë punonjës të caktuar me gradën pasardhëse. Tashmë kryepolici ka hapësirë ligjore të promovojë figura të reja duke i dhënë gradat para afatit, kur ky fakt argumentohet me rezultate.

Megjithatë, saktësime janë bërë për shefat e komisariateve që do të kenë kusht gradën “komisar” ose “kryekomisar”.

Pas propozimit të deputetit socialist Bujar Rexha, mazhoranca miratoi ndryshime në ligjin për Policinë e Shtetit, duke synuar riformatimin e sistemit të gradave në polici.

Sipas së majtës, procedurat aktuale të konkurrimit janë kthyer në pengesë për funksionimin normal të strukturave policore dhe kanë ulur eficencën në terren. /a2