SPAK: Transaksione milionëshe për pronat në Akërni dhe Zvërnec
Prokuroria e Posaçme (SPAK) ka zbardhur detaje të reja nga hetimi për tjetërsimin e pronave në zonat bregdetare të Akërnisë dhe Zvërnecit në Vlorë, ku dyshohet për pastrim parash, falsifikim dokumentesh dhe veprime të koordinuara mes disa personave dhe kompanive.
Sipas dosjes hetimore, Artur Shehu ka qenë në qendër të transaksioneve të pronave, ndërsa përfaqësuesit e tij prej vitesh kanë qenë Leonard Bishaj dhe Pullumb Petritaj. Prokurorët thonë se këta persona kanë ndjekur procedurat për kthimin, regjistrimin dhe më pas shitjen e sipërfaqeve të mëdha të tokës, ndaj kërkohet kontrolli i banesave dhe i tyre personal për gjetjen e dokumenteve që mund të ndihmojnë hetimin.
Nga verifikimet e SPAK rezulton se mes Artur Shehut dhe familjarëve të Pullumb Petritajt janë kryer një sërë transaksionesh pronash ndër vite. Një prej tyre lidhet me shitjen e një pasurie prej 1 milion metrash katrorë në zonën kadastrale 1007 të Vlorës, e blerë në vitin 2014 nga Ina Petritaj për 253 milionë lekë.
Hetimet kanë zbuluar gjithashtu se avokati Enkes Hysendhima ka luajtur rol aktiv në koordinimin e shitjeve të pronave që lidhen me Artur Shehun dhe Ferdinant Sulajn, megjithëse nuk rezulton zyrtarisht përfaqësues i ndonjërës prej palëve. Për këtë arsye SPAK ka kërkuar kontroll edhe në zyrën e tij të avokatisë për të siguruar dokumente me interes për hetimin.
Në fokus të hetimit janë edhe transaksionet e kryera nga shoqëria “Albania Land Development”, e administruar nga Redi Struga. Sipas dokumenteve, në nëntor 2025 kompania lidhi një kontratë për blerjen e mbi 1 milion metrave katrorë tokë në Zvërnec nga Artur Shehu për 5.5 milionë euro. Vetëm pesë muaj më vonë, në prill 2026, e njëjta pronë rezulton të jetë shitur për 122 milionë euro.
Po ashtu, kompania ka blerë prona të tjera nga Ferdinant Sulaj dhe familjarët e tij për dhjetëra milionë euro, ndërsa në Akërni ka lidhur kontrata edhe me Feriare Ndreun për një sipërfaqe prej 78 mijë metrash katrorë me vlerë 2 milionë euro.
Sipas SPAK, një tjetër element me interes janë marrëdhëniet e biznesit mes Redi Strugës dhe Artur Shehut. Dokumentet tregojnë se ata kanë kryer transaksione të përbashkëta prej vitesh, përfshirë shitje pronash, kontrata sipërmarrjeje dhe projekte zhvillimi në vijën bregdetare të Akërnisë dhe Zvërnecit.
Prokuroria dyshon se këto veprime janë kryer në mënyrë të koordinuar dhe me interesa të përbashkëta ekonomike, ndaj kontrollet e urdhëruara nga Gjykata e Posaçme synojnë sigurimin e dokumenteve, komunikimeve dhe provave të tjera që mund të hedhin dritë mbi origjinën dhe ligjshmërinë e këtyre transaksioneve milionëshe.
