SPAK ka lëshuar sot tre urdhër-arreste ndaj Ergys Agasit, Ermal Beqirit dhe Mirlinda Karçanajt, pas një hetimi njëvjeçar të drejtuar nga prokurori Bledar Maksuti, që ka zbuluar një skemë të organizuar abuzimi me tenderët e AKSHI, e shoqëruar edhe me akte shantazhi dhe marrje peng ndaj biznesmenëve konkurrentë.
Burime pranë hetimit bëjnë me dije se biznesmeni Gerond Meçe, administrator i kompanisë Advanced Business Solution, dyshohet se është mbajtur peng dhe është shantazhuar, me qëllim që të tërhiqej nga gara për tenderë publikë të AKSHI dhe të hiqte dorë nga ankimimet ligjore kundër procedurave të dyshimta.
Pengmarrje për të pastruar garën e tenderëve
Sipas SPAK, kompania e Meçes kishte ankimuar pothuajse të gjitha tenderët e mëdhenj të AKSHI, duke denoncuar parregullsi dhe konflikt interesi me kompaninë Soft & Solution të Ermal Beqirit. Megjithatë, në mënyrë të papritur, të gjitha ankimimet janë tërhequr, fakt që ka ngritur dyshime serioze për presion të jashtëligjshëm.
Hetimet kanë zbuluar se kjo tërheqje nuk ka qenë vullnetare, por dyshohet se ka ardhur pas një episodi të rëndë shantazhi dhe mbajtjeje peng, i cili kishte për qëllim pastrimin e garës dhe garantimin e fitores së paracaktuar të Soft & Solution.
Arrestime dhe hetim në thellësi në AKSHI
Gjatë ditëve të fundit, SPAK ka thirrur për marrje në pyetje rreth 20 punonjës dhe zyrtarë drejtues të AKSHI, përfshirë Mirlinda Karçanajn, e cila u mbajt për rreth 4 orë në pyetje.
Karçanaj dyshohet për veprën penale “Shkelje e barazisë së pjesëmarrësve në tendera apo ankande publike”, pasi sipas hetimeve, fituesit e tenderëve ishin të paracaktuar, ndërsa konkurrentët realë eliminoheshin përmes presionit dhe shantazhit.
Skemë kriminale me fatura fiktive
Në qendër të dosjes ndodhet kompania Soft & Solution, e cila dyshohet se ka shërbyer si mekanizëm për përvetësimin dhe shpërndarjen e fondeve publike të AKSHI.
Sipas burimeve, pas fitimit të tenderëve, kompania e Beqirit lidhte kontrata shërbimi fiktive me kompani të lidhura me persona që kishin ndikim mbi vendimmarrjen në AKSHI dhe KVO, ndërsa puna reale kryhej nga i njëjti staf.
SPAK po heton faturat e shërbimeve, pasi dyshohet se janë përdorur për justifikimin e transfertave financiare të paligjshme.
“Ndiq paratë” dhe roli i ‘hinkës financiare’
Burime për Skyweb.al bëjnë me dije se SPAK ka verifikuar edhe një adresë në qendër të Tiranës, e përdorur si zyrë nga kompanitë e përfshira në skemë.
Hetimi po zhvillohet sipas parimit “ndiq paratë”, ku dyshohet se Ermal Beqiri ka vepruar si “hinkë financiare”, duke kanalizuar fondet publike drejt personave që kanë organizuar dhe mbrojtur skemën.
40 milionë euro tendera dhe lëvizje të dyshimta jashtë vendit
Sipas hetimeve paraprake, kompanitë e përfshira kanë përfituar rreth 40 milionë euro tendera publikë, kryesisht nga AKSHI.
Ndërkohë, burime konfidenciale bëjnë me dije se Ermal Beqiri ka kryer disa lëvizje brenda dhe jashtë vendit, përfshirë një shtet të BE-së, pas thellimit të hetimeve të SPAK.
SPAK pritet të zbulojë një mega-skandal të paprecedentë, ku përveç korrupsionit dhe abuzimit me fondet publike, dyshohet edhe përdorimi i metodave kriminale për kontrollin e tenderëve shtetërorë.