Një skemë e dyshuar për përfitim të paligjshëm të fondeve publike ka dalë në dritë, ku në qendër të akuzave janë kompanitë “Arb&Trans-2010 shpk” dhe “Klajger Konstruksion shpk”, të cilat pretendohet se kanë bashkëpunuar përmes falsifikimit të dokumentacionit për të përfituar pagesa nga Bashkia e Tiranës.
Sipas të dhënave të siguruara, Shyqyri Maloku, një nga firmëtarët e dokumenteve zyrtare, rezulton të jetë babai i Arben Malokut, person i njohur për afërsinë e tij me ish-kryebashkiakun e Tiranës, Erion Veliaj, aktualisht i arrestuar dhe nën hetim për një sërë akuzash të rënda. Emri i Arben Malokut është përmendur edhe më herët si përfitues i tenderave publikë nga Bashkia e Tiranës, denoncuar dhe nga Partia Demokratike dhe Belind Këlliçi.
Burime bëjnë me dije se kompania “Arb&Trans-2010 shpk”, e konsideruar si një nga subjektet e favorizuara, ka lidhur një bashkëpunim me “Klajger Konstruksion shpk” për kryerjen e punimeve të demolimit dhe evadimit të mbetjeve ndërtimore për disa objekte banimi në kryeqytet.
Sipas dokumentacionit, subjektet në formën e një BOE (Bashkim Operatorësh Ekonomikë) kanë deklaruar kryerjen e punimeve në të paktën 6 pallate, konkretisht:
Pallati nr. 164/2, rruga “Ali Kelmendi” – 2,241,803.40 lekë
Pallati nr. 152, rruga “Haki Stërmilli” – 1,792,243.90 lekë
Pallati nr. 140, rruga “Haki Stërmilli” – 2,786,205.80 lekë
Pallati nr. 161, rruga “Sokrat Mosko” – 1,588,583.30 lekë
Pallati nr. 14, rruga “Llambi Bonata” – 5,058,507.50 lekë
Pallati nr. 158, rruga “Llambi Bonata” – 1,558,038.40 lekë
Vlera totale e deklaruar për likuidim arrin në 14,274,113 lekë.
Dokumenti përkatës është firmosur nga Shyqyri Maloku, Aleksandra Muhametllari, Orgeta Kapllani, Aurel Çuko, Aurel Boriçi dhe Eleana Jaupaj, çka ngre dyshime serioze mbi përgjegjësinë institucionale dhe ligjore të personave të përfshirë.
Ndërkohë, më 10 nëntor 2021, në Bashkinë e Tiranës është dorëzuar edhe fatura e shitjes nga subjekti “Arb&Trans-2010 shpk” drejt institucionit blerës, Bashkia Tiranë, për një vlerë totale prej 15,025,382 lekë, shifër kjo që ngre pikëpyetje mbi përputhshmërinë e saj me vlerat e deklaruara më herët.
Rasti në fjalë pritet të tërheqë vëmendjen e organeve të drejtësisë, ndërsa mbeten ende të paqarta rrethanat reale të kryerjes së punimeve dhe ligjshmëria e dokumentacionit të paraqitur për përfitimin e fondeve publike.
Gjykata e Tiranës ka lënë në fuqi masat e sigurisë për zyrtarët e Bashkisë Tiranë dhe IMT-së që akuzohen për shpërdorim detyre e falsifikim dokumentesh lidhur me shembjen e pallateve të dëmtuara nga tërmeti në Kombinat. Aurel Çuko, Aurel Boriçi dhe Sokol Qehajaj u lanë në arrest shtëpie ndërkohë, Eleana Guçe, Rexhina Rakipi, Aleksandra Mahmutllari, Shyqyri Maloku dhe Fatmir Firi u lanë në detyrim paraqitje.
