Kreu i Prokurorisë së Posaçme, Altin Dumani, foli sot në Komisionin e Ligjeve për hetimet mbi çështjen e mikrokredive, duke konfirmuar se hetimet kanë përfunduar dhe dosja ndodhet tashmë në Gjykatën e Posaçme të Shkallës së Parë për Korrupsion dhe Krimin e Organizuar.
“Çështja e mikrokredive, hetimet për krijuesit kanë përfunduar dhe është dërguar për gjykim. Janë dërguar për gjykim 16 shtetas dhe 4 persona juridik, ndërsa janë sekuestruar 420 milionë lekë dhe 1.3 milionë euro, si dhe pasuri të luajtshme e të paluajtshme. Po verifikohet pozita e secilit person të përfshirë,” deklaroi Dumani.
Sipas njoftimit të mëparshëm të SPAK, të bërë publik në korrik, në bankën e të akuzuarve janë dërguar 16 persona dhe 4 shoqëri financiare: Micro Credit Albania, FINAL, ADCA, SHP Zig, FS dhe FLASH.
Hetimet zbuluan një skemë të mirëorganizuar mashtrimi financiar, ku qytetarëve u janë mbledhur detyrime të fryra jashtë çdo norme ligjore dhe janë përvetësuar miliona euro përmes praktikave abuzive të kreditimit dhe mbledhjes së borxheve.
SPAK ka sekuestruar 420 milionë lekë dhe 1.3 milionë euro si të ardhura të dyshuara nga aktiviteti kriminal, ndërsa theksoi se vijon verifikimi i pasurive të personave të përfshirë dhe i rolit të çdo subjekti në këtë aferë financiare.