TIRANË- Administrata Tatimore ka zbuluar 4,041 ton mish të padeklaruar dhe 9.3 milionë euro të ardhura të fshehura dhe ka kallëzuar penalisht një subjekt të madh tregtar. Përmes një postimi në rrjete sociale, Drejtoria e Përgjithshme e Tatimeve bën me dije se pas verifikimeve është konstatuar zbuluar shkelje serioze të legjislacionit tatimor në fuqi, duke kryer evazion fiskal.
Sipas njoftimit, gjatë kontrollit u identifikuan mospërputhje midis inventarit fizik dhe atij të deklaruar në sasi ndërkohë që vlera totale e dëmit të konstatuar arrin në rreth 6.4 milionë euro, ndërsa rasti është përcjellë për ndjekje pranë Prokurorisë së Tiranës. Burime bëjnë me dije se bëhet fjalë për kompaninë “Kazazi Shpk”.
“Vijon aksioni për garantimin e sigurisë ushqimore dhe formalizimin e sektorit të tregtimit të produkteve blegtorale. Në këtë kuadër, Administrata Tatimore identifikoi një subjekt të tatimpaguesve të mëdhenj që ushtron aktivitetin e tregtimit të produkteve me shumicë të produkteve me shtazore, në kundërshtim me ligjislacionin tatimor në fuqi, duke kryer evazion fiskal. Nga verifikimet e kryera nga Drejtoria e Tatimpaguesve të Mëdhenj në Administrat Tatimore është identifikuar mospërputhje midis inventarit fizik dhe atij të deklaruar me sasinë 4,041 ton nënprodukte të mishit. Nga Drejtoria e Tatimpaguesve të Mëdhenj u konkludua se subjekti ka fshehur të ardhurat në vlerën 9.3 milionë euro. Rasti iu referua më tej Hetimit Tatimor, i cili e përcolli për ndjekje dhe trajtim pranë Prokurorisë së Tiranës për veprën penale të evazionit fiskal, me një dëm të vlerësuar të të ardhurave tatimore në vlerën e rreth 6,4 milionë euro”, thuhet në njoftim.
