Vila dhe truall, çfarë u sekuestruar gjatë 2025
Agjencia e Administrimit të Pasurive të Sekuestruara dhe të Konfiskuara ka bërë publik versionin e përditësuar për vitin 2025 të katalogëve zyrtarë që pasqyrojnë pasuritë nën administrimin e saj. Bëhet fjalë për Katalogun e Pasurive të Sekuestruara dhe atë të Pasurive të Konfiskuara, të cilët janë rishikuar për të përfshirë të gjitha ndryshimet e ndodhura gjatë vitit.
Këto katalogë ishin publikuar fillimisht në fillim të vitit 2025 dhe tashmë janë përditësuar për të reflektuar gjendjen reale të pasurive deri në fund të vitit, përfshirë hyrjet e reja, ndryshimet e statusit ligjor dhe mënyrën e administrimit të tyre.
Përditësimi është pjesë e procesit të vazhdueshëm të inventarizimit dhe monitorimit të pasurive të vendosura nën administrimin e agjencisë.
Sipas AAPSK, publikimi periodik i këtyre katalogëve ka për qëllim rritjen e transparencës dhe forcimin e llogaridhënies institucionale, duke u dhënë qytetarëve dhe institucioneve akses të hapur në informacion mbi pasuritë e sekuestruara dhe të konfiskuara.
Dokumentet ofrojnë një panoramë të detajuar mbi llojin e pasurive, statusin e tyre ligjor dhe mënyrën se si administrohen.
Drejtuesja e agjencisë ka theksuar se përditësimi i vazhdueshëm i katalogëve është pjesë e një angazhimi për administrim të përgjegjshëm dhe transparent, duke nënvizuar se për herë të parë këto pasuri po dokumentohen dhe bëhen publike në mënyrë të strukturuar dhe të standardizuar.
Agjencia sqaron gjithashtu se vlerat e pasqyruara në katalogë janë orientuese dhe nuk përfaqësojnë vlerën reale të tregut.
Ato bazohen në dokumentacionin zyrtar dhe dosjet përkatëse hetimore dhe publikohen vetëm për qëllime informimi dhe transparence, jo për shitje apo tjetërsim të pasurive.
AAPSK deklaron se do të vijojë administrimin e pasurive në përputhje me parimet e ligjshmërisë, eficiencës dhe interesit publik, duke synuar një menaxhim sa më profesional të aseteve që i janë besuar nga institucionet e drejtësisë.