Partia Demokratike ka publikuar sot një tjetër denoncim për atë që e cilëson si skandal korruptiv në Burrel, ku unaza e qytetit është çarë dhe dëmtuar ende pa u përfunduar punimet.
Zëdhënësja e Antikorrupsionit në PD, Genta Vangjeli, deklaroi nga selia blu se propaganda e kryeministrit Edi Rama “po zbulohet dita-ditës”, duke përmendur rastin e fundit me rrugën në Burrel.
Më 22 tetor, Rama publikoi në Facebook foto nga punimet e unazës, duke treguar se po hidhnin shtresat e fundit të asfaltit dhe se veprat e artit ishin drejt finalizimit.
Sipas PD-së, realiteti është krejt tjetër.
Kontrata dhe mbikëqyrja e punimeve sipas PD-së
PD deklaron se më 6 mars, ARRSH nënshkroi një kontratë me kompaninë Ulza sh.p.k (me mbështetje nga ASI 2A CO sh.p.k), me objekt “Sistemim asfaltim rrugët e Drejtorisë së Rajonit Verior Shkodër”, me vlerë 1.2 milion euro.
Ndërkohë, mbikëqyrja e punimeve iu dha një bashkimi operatorësh (LENI ING SHPK – ANGERBA SHPK), fitues i shpallur më 2 qershor, tre muaj pas kontratës së punimeve civile – edhe pse procedurat e ndërtimit dhe mbikëqyrjes duhet të ecin paralelisht.
PD thekson se në tabelën informuese në terren nuk shfaqet bashkimi fitues i operatorëve, por figuron punonjësi i ARRSH-së, Nikollaq Mihali, si mbikëqyrës.
Sipas opozitës, nuk dihet çfarë ka ndodhur me fondet për mbikëqyrjen dhe pse fituesit e shpallur në dokumente nuk u panë në terren. E vetmja gjë e sigurt, sipas tyre, është se punimet e kontratës 1.2 milion euro janë mbikëqyrur nga një punonjës i ARRSH.
Rruga çahet para përfundimit – PD kërkon hetim nga SPAK
Në pamjet e publikuara, asfalti shfaqet i çarë dhe i dëmtuar, pavarësisht se punimet nuk janë dorëzuar ende plotësisht.
Vangjeli deklaroi se “kjo është fytyra e propagandës qeveritare, e cila mundohet të fshehë dëmin, korrupsionin dhe papërgjegjshmërinë me foto në rrjetet sociale”.
Partia Demokratike kërkon që SPAK të nisë urgjentisht hetimet, duke theksuar se shqiptarët “nuk meritojnë mashtrim, vjedhje dhe korrupsion”.
