Komisioni i Prokurimit Publik (KPP) zhbllokoi , pas gati një viti pezullim, një nga tenderët më të debatueshëm të Agjencisë Kombëtare të Shoqërisë së Informacionit (AKSHI), me vlerë rreth 2.4 milionë euro. Vendimi i KPP-së i hap rrugën rifillimit të procesit të vlerësimit të ofertave.
Bëhet fjalë për procedurën “Përmirësimi dhe Integrimi i Sistemeve të Menaxhimit të Informacionit për Ndihmën Ekonomike, Personat me Aftësi të Kufizuara dhe Shërbimin Social”, me fond limit rreth 2.4 milionë euro.
Si nisi çështja
Procedura u shpall në dhjetor 2024 dhe, në qershor 2025, fituese u shpall bashkia e operatorëve Advanced Business Solutions (ABS) dhe Synapse, me një ofertë rreth 1.9 milionë euro. Pak ditë më vonë, AKSHI anuloi procedurën duke pretenduar “mungesa në dokumentacion”, duke e kthyer tenderin nga fillimi.
ABS dhe Synapse u ankuan në KPP, e cila në korrik vendosi pezullimin e çdo veprimi nga AKSHI deri në shqyrtimin e plotë të pretendimeve.
Përveç tyre, në garë ishte edhe bashkimi IMAGE & COMMUNICATION DEVELOPMENT – HardTech shpk, me një ofertë afro 2.3 milionë euro. Një tjetër kompani, NAOL shpk, shprehu interes, por pa dorëzuar ofertë.
Zhvillimet me hetimet e SPAK
Zhbllokimi i tenderit ndodhi pak ditë pasi në SPAK u shfaqën zhvillime të rëndësishme lidhur me hetimet për disa procedura të teknologjisë së informacionit. Sipas burimeve të Skyweb.al, ish-drejtuesja e AKSHI-t, Mirlinda Karçanaj, është marrë në pyetje nga prokuroria për rreth tre orë në lidhje me rreth 12 tenderë të dyshuar për parregullsi.
Po ashtu, biznesmeni Ermal Beqiri, pronar i kompanisë Soft & Solution, si dhe Gerond Meçe, drejtues i Advanced Business Solutions, raportohet se po verifikohen për rolin e tyre në disa procedura të AKSHI-t. Burimet theksojnë se SPAK po shqyrton edhe arsyet e tërheqjes së papritur të ankimeve nga Meçe në disa tenderë ku ai kishte paraqitur kundërshtime të njëpasnjëshme.
Çfarë pritet më tej
Me vendimin e KPP-së, tenderi i bllokuar prej muajsh kthehet për vlerësim nga e para dhe AKSHI duhet të rishqyrtojë ofertat e operatorëve ekonomikë.
Hetimet e SPAK për procedurat e teknologjisë së informacionit vijojnë, ndërsa pritet të sqarohet se si janë administruar fondet publike në tenderët e viteve të fundit dhe nëse do të ketë referime të mëtejshme penale.
