SPAKU nëpër këmbë, AKSHI gati për të shpenzuar mbi 720 milion euro

SPAKU nëpër këmbë, AKSHI gati për të shpenzuar mbi 720 milion euro

Open Data Albania në këtë artikull po analizon Listën e Investimeve të Agjencisë Kombëtare të Shoqërisë së Informacionit (AKSHI) për vitin 2026. Artikulli rendit projektet me financimin më të lartë për vitin 2026, projektet me vlerën më të lartë të portofolit, si dhe ndarjen e investimeve sipas burimit të financimit (financim i brendshëm dhe financim i huaj).

Të dhënat janë marrë nga Lista e Investimeve Publike 2026, e depozituar në Kuvend si pjesë e Projektligjit për Buxhetin e Vitit 2026.

Sipas kësaj liste, AKSHI rezulton me gjithsej 50 projekte investimi, nga të cilat 45 projekte me financim të brendshëm dhe 5 projekte me financim të huaj. Vlera totale e portofolit të investimeve arrin në rreth 38.62 miliardë lekë, ndërsa financimi i planifikuar për vitin 2026 kap vlerën 7.01 miliardë lekë, ose 18.2% të vlerës totale të portofolit.

Krahasuar me Buxhetin 2025 (Plan), i cili rezulton në vlerën 4.61 miliardë lekë, plani i vitit 2026 paraqet një rritje prej rreth 52%, duke reflektuar zgjerimin e portofolit të investimeve digjitale.

Burimi: Kuvendi, Paketa e Projektligjit për Buxhetin e Vitit 2026
Komente dhe Analiza: Open Data Albania

Data.Al: AKSHI – Portofoli i Investimeve 2026 & Financimi Vjetor 2025-2028 
Burimi: Kuvendi, Paketa e Projektligjit për Buxhetin e Vitit 2026
Komente dhe Analiza: Open Data Albania

“Modernizimi i sistemit të prokurimeve publike” rezulton investimi me financimin më të lartë për vitin 2026, me rreth 1.15 miliardë lekë të planifikuara për këtë vit. Ky projekt ka nisur në vitin 2025, me një buxhet fillestar të planifikuar prej 500 milionë lekësh për vitin 2025, dhe ka afat përfundimi vitin 2028. Vlera totale e projektit është rreth 1.9 miliardë lekë, ndërsa financimi i planifikuar për vitin 2026 përbën rreth 60.7% të vlerës totale të tij.

Në vend të dytë renditet “Përmirësimi i shërbimeve elektronike me teknologji mikroservisi”, me 600 milionë lekë të planifikuara për vitin 2026. Ky projekt, i nisur në vitin 2024, ka një vlerë totale portofoli prej rreth 1.70 miliardë lekë dhe pritet të përfundojë në vitin 2027.

I treti në renditje është “Implementimi i Platformës Qeveritare të Ndërveprimit 2.0 dhe site sekondar”, me një financim të planifikuar për vitin 2026 prej 563.6 milionë lekësh, duke ruajtur një peshë të konsiderueshme në buxhetin vjetor të AKSHI-t.

Përveç këtyre projekteve kryesore, financime të konsiderueshme për vitin 2026 rezultojnë edhe për “Sistemet TIK për Drejtorinë e Përgjithshme të Tatimeve (DPT) (Integrim në BE)” me 463 milionë lekë, “Sistemet TIK për Ministrinë e Bujqësisë dhe Zhvillimit Rural (MBZHR) dhe Agjencia për Zhvillim Bujqësor dhe Rural (AZHBR) (Integrim në BE)” me 400 milionë lekë, “Implementimin e infrastrukturës së qendërzuar” me 336.2 milionë lekë, projekti “Shoqëria Oracle” me 300 milionë lekë, si dhe projekte të tjera mbështetëse të sistemeve financiare dhe të menaxhimit të dokumenteve.

Në total, 5 projektet kryesore përqendrojnë rreth 49.3% të buxhetit të vitit 2026, ndërsa 10 projektet kryesore marrin 68.3% të financimit vjetor.

Burimi: Kuvendi, Paketa e Projektligjit për Buxhetin e Vitit 2026
Komente dhe Analiza: Open Data Albania

Burimi: Kuvendi, Paketa e Projektligjit për Buxhetin e Vitit 2026
Komente dhe Analiza: Open Data Albania

Sipas vlerës totale të projektit, në vend të parë renditet “Digjitalizimi i pushtetit vendor”, një projekt i ri me vlerë totale portofoli prej rreth 4.1 miliardë lekë. Ky projekt paraqitet me financim zero për vitin 2026 në listën shoqëruese të projektligjit të buxhetit, ndërsa financimi në vitet pasuese është i përqendruar kryesisht në vitin 2028, me rreth 2.86 miliardë lekë, ose 70.1% të totalit të projektit.

Në vend të dytë renditet investimi “Bashkëfinancimi me projektet IPA në Digjitalizim”, me vlerë totale 2.92 miliardë lekë. Ky projekt ka planifikim prej 50 milionë lekësh për vitin 2026, ndërsa pjesa dominuese e angazhimeve financiare paraqitet pas vitit 2028, me rreth 2.54 miliardë lekë, ose 87% të totalit të projektit.

Në vijim renditen edhe “Modernizimi i sistemit të prokurimeve publike” me 1.9 miliardë lekë, “Përmirësimi i shërbimeve elektronike me teknologji mikroservisi” me 1.70 miliardë lekë, si dhe “Sistemet TIK për MBZHR dhe AZHBR (Integrim në BE)” me 1.43 miliardë lekë vlerë totale portofoli, së bashku me projekte të tjera që plotësojnë portofolin shumëvjeçar të institucionit.

Burimi: Kuvendi, Paketa e Projektligjit për Buxhetin e Vitit 2026
Komente dhe Analiza: Open Data Albania

Lista e investimeve të AKSHI për vitin 2026 përfshin si investime me financim tërësisht të brendshëm, ashtu edhe investime me financim të huaj, nga burime të ndryshme ndërkombëtare. Konkretisht, 45 projekte rezultojnë me financim të brendshëm, me një vlerë totale financimi të planifikuar për vitin 2026 prej rreth 6.44 miliardë lekësh, duke mbuluar kryesisht sistemet bazë TIK, projektet sektoriale mbështetëse dhe zhvillimin ose mirëmbajtjen e platformave ekzistuese.

Paralelisht, lista përfshin edhe 5 projekte me financim të huaj, me një vlerë totale portofoli prej rreth 14.28 miliardë lekësh dhe një financim të planifikuar për vitin 2026 prej rreth 570 milionë lekësh. Këto projekte lidhen kryesisht me programe të mbështetura nga World Bank dhe European Union (IPA), si dhe instrumente të tjera të bashkëfinancimit ndërkombëtar, duke pasur në përgjithësi një profil të theksuar shumëvjeçar dhe angazhime të konsiderueshme në vitet pasuese.

Burimi: Kuvendi, Paketa e Projektligjit për Buxhetin e Vitit 2026
Komente dhe Analiza: Open Data Albania

Lista e investimeve të AKSHI për vitin 2026 paraqet një portofol investimesh me angazhime shumëvjeçare, ku financimi vjetor është i përqendruar në një numër të kufizuar projektesh, ndërsa një pjesë e konsiderueshme e vlerës totale shtrihet në vitet pasuese. Kjo e bën të rëndësishëm monitorimin e vazhdueshëm të zbatimit të projekteve dhe të angazhimeve buxhetore të lidhura me to.