Skandali me betonieren e rrëzuar/ Patentat egjiptiane nuk njihen në Shqipëri, por si lëviznin 2 egjiptianët?!
Dy shtetasit egjiptianë, njëri drejtues i autobetonieres dhe tjetri pasagjer, të cilët humbën jetën në aksidentin e së mërkurës pranë TEG-ut, nuk ishin pajisur me leje drejtimi shqiptare dhe as me Dëshmi të Aftësisë Profesionale për profilin “Automakinist”.
Pas lajmit të VoxNews me burime nga Policia, reagoi Drejtoria e Përgjithshme e Shërbimeve të Transportit Rrugor, e cila theksonte se në regjistrat e saj nuk rezulton që dy shtetasit të jenë pajisur me dokumentacionin e nevojshëm për drejtimin e automjeteve për përdorim të veçantë, ku përfshihen edhe autobetonieret.
Institucioni sqaron se legjislacioni shqiptar u lejon shtetasve të huaj të qarkullojnë në vend me lejet e drejtimit të vlefshme të lëshuara nga autoritetet e shtetit të tyre, për periudhën e parashikuar në Kodin Rrugor.
DPSHTRR thekson ndër të tjera se Shqipëria nuk ka marrëveshje reciprociteti me Egjiptin për njohjen apo konvertimin e lejeve të drejtimit, ndaj pretendimet se dy shtetasit ishin pajisur me dokumentacion shqiptar cilësohen të pavërteta.
Por si lëviznin dy egjiptianët?!
Sipas Kodit Rrugor një shtetas egjiptian mund të drejtojë mjet si vizitor vetëm në kushtet e parashikuara nga ligji (zakonisht me leje ndërkombëtare drejtimi, kur kjo pranohet, dhe për një periudhë të kufizuar), por kjo nuk do të thotë se mund të punësohet si shofer profesionist me patentën egjiptiane.
Për punësim si shofer në një kompani shqiptare, sidomos për mjete të rënda (kategoritë C, CE, D etj.), në përgjithësi kërkohet që drejtuesi të zotërojë një leje drejtimi të vlefshme dhe të njohur në Shqipëri, si edhe të plotësojë kërkesat për kualifikimin profesional, kur ato zbatohen.
Të “paprekshmit” nga Policia Rrugore
Kompania punëdhënëse (ALBA – BETON) duhet të mbajë përgjegjësi nëse ka punësuar një shofer pa verifikuar vlefshmërinë e patentës, lejen e punës, dokumentet e nevojshme ose kualifikimin profesional.
Punëdhënësi (ALBA – BETON) ka detyrimin të sigurohet që drejtuesit e mjeteve të tij i plotësojnë kërkesat ligjore.
Ende nuk ka asnjë reagim nga kompania (ALBA – BETON) për këtë tragjedi, të cilën fati e deshte të mos kthehej në një masakër.
Edhe Policia Rrugore ka zgjedhur të heshtë për këtë ngjarje, kjo e fundit ka për detyrë të marrë masat që parashikohen nga legjislacioni. Këto masa përfshijnë:
1. Verifikimin e vlefshmërisë së patentës nëse njihet në Shqipëri.
2. Verifikimin e dokumenteve të identifikimit, lejes së qëndrimit dhe, kur është e nevojshme, lejes së punës.
3. Ndalimin e drejtimit të mjetit nëse konstatohet se drejtuesi nuk ka të drejtë ligjore të drejtojë.
4. Vendosjen e masave administrative (gjobë ose masa të tjera) sipas shkeljes së konstatuar.
5. Referimin e rastit tek organet hetimore nëse ka dyshime për vepër penale (p.sh. përdorim dokumentesh të pavlefshme ose lejim i drejtimit në kundërshtim me ligjin).
6. Verifikimin edhe të përgjegjësisë së pronarit ose kompanisë që ka vënë në dispozicion mjetin, nëse ka lejuar një person pa të drejtë drejtimi ta përdorë atë.
Policia Rrugore duhet ti përgjigjet pyetjes: A janë kompanitë e ndërtimit mbi ligjin?
Hetimi duhet të sqarojë nëse Policia Rrugore ka kryer kontrollet e parashikuara nga ligji dhe nëse kompania ka respektuar detyrimin për të verifikuar vlefshmërinë e lejes së drejtimit të punonjësve të saj.
Ndërkohë shkrimi i radhës do jetë për zyrat e punësimit të të huajve dhe pse policia nuk ka marrë asnjë masë ndaj administratorit të kompanisë (ALBA – BETON).
VIJON….
©Copyright Vox News
