Skandali i zbuluar me tenderat e Agjencisë Kombëtare të Shoqërisë së Informacionit ka nxjerrë në pah edhe rrëmbimin e biznesmenit Gerond Meçe, i cili është mbajtur me forcë për disa orë nga persona ende të paidentifikuar.
Ngjarja e rëndë ka ndodhur në garazhin e banesës së tij, ku sipas të dhënave, persona të veshur me uniforma të vjetra policie e kanë marrë peng. Nën presion dhe kërcënime, biznesmeni është futur me forcë në një automjet, ku i është mbuluar fytyra, dhe është transportuar drejt një zone në Elbasan.
Atje, personat e paidentifikuar i kanë dhënë një aparat celular dhe i kanë kërkuar të telefonojë administratorin e kompanisë, me qëllim që të tërhiqte ankimimet e depozituara në Komisionin e Prokurimit Publik (KPP). Sipas burimeve, Meçe ka kryer telefonatën dhe menjëherë pas saj janë tërhequr ankimimet për pesë tendera me vlera të konsiderueshme financiare.
Pas këtij veprimi, biznesmeni është lënë i lirë dhe ka dalë në një rrugë kryesore, ku ka marrë një automjet dhe është kthyer në banesën e tij në Tiranë.
Duke qenë nën presion të vazhdueshëm dhe nga frika për sigurinë e tij, Gerond Meçe nuk ka bërë kallëzim në Policinë e Shtetit, por ka njoftuar Ambasadën Gjermane. Pas ngjarjes, ai rezulton se është larguar nga Shqipëria së bashku me familjen e tij.
Po ashtu, burime bëjnë me dije se pas largimit të biznesmenit Meçe, kompania e tij nuk ka funksionuar më si më parë. Disa prej punonjësve kanë nisur punë pranë kompanisë “Soft Solution”, në pronësi të Ermal Beqirit, i cili rezulton në kërkim së bashku me Ergys Agasin.
