Pse nuk ikën nga policia Drejtoresha Ervina Gjana? Dyshimet se i ka shërbyer Agasit, GJL: Telefonat i duhen SPAK, mos i kërko
Gjykata e Lartë e Shqipërisë ka rrëzuar rekursin e zyrtares së lartë të policisë së shtetit, Ervina Gjana, e cila kërkonte kthimin e aparateve celularë të sekuestruar nga SPAK në kuadër të hetimeve për tenderët e AKSHI.
Gjana kishte kundërshtuar vendimin e shkallës së dytë të gjyqësorit, e cila kishte pranuar vetëm kthimin e telefonave që rezultonin në përdorim nga fëmijët e saj, ndërsa kishte lënë në fuqi sekuestron për pajisjet e tjera. Pas këtij vendimi, ajo iu drejtua Gjykatës së Lartë duke kërkuar kthimin e tetë aparateve celularë, por rekursi i saj është rrëzuar.
Sekuestrimi i telefonave u bë gjatë kontrolleve të ushtruara nga SPAK në banesën e zyrtares, në kuadër të hetimeve për çështjen e tenderëve të AKSHI-t. Sipas të dhënave hetimore, bashkëshorti i saj rezulton të ketë qenë shofer i biznesmenit Ergys Agasi. Bëhet fjalë për shtetasin Renato Hristic, i cili gjithashtu është nën hetim nga struktura e posaçme.
Në lidhje me këtë çështje, masa sigurie janë vendosur ndaj shtatë personave, mes tyre ish-drejtoresha e AKSHI-t Mirlinda Karçanaj dhe zv.drejtoresha Hava Delibashi. Ndërkohë në kërkim vijojnë biznesmenët Ergys Agasi dhe Ermal Beqiri, të cilët SPAK i konsideron përfituesit kryesorë të tenderëve të AKSHI-t.
Sipas hetimeve paraprake, Agasi dhe Beqiri, në bashkëpunim me persona të tjerë, dyshohet se ushtronin presion dhe shantazh ndaj biznesmenëve për t’u tërhequr nga garat e tenderëve publikë. Hetimet për këtë skemë vijojnë nga SPAK.