Nga janari i vitit 2026, drejtuesit e automjeteve në Shqipëri pritet të përballen me një tjetër rritje të tarifave të siguracionit, duke shënuar kështu rritjen e dytë brenda 12 muajve. Sipas Autoritetit të Mbikëqyrjes Financiare (AMF), ndryshimet vijnë si rezultat i hyrjes në fuqi të sistemit bonus–malus, një skemë e re që, sipas autoritetit, do të sjellë përfitime për rreth 96% të drejtuesve të mjeteve.
Megjithatë, kjo rritje e re vjen pas shtrenjtimit deri në 30% të tarifave të siguracionit të makinave që hyri në fuqi në janar 2025, rritje e cila u konsiderua e koordinuar mes kompanive të tregut dhe e miratuar nga AMF.
Ekspertët e sigurisë rrugore e shohin me skepticizëm funksionimin real të sistemit bonus–malus. Sipas ekspertit Fadil Likaj, drejtuesit e mjeteve gjatë vitit 2025 kanë paguar nga 2,000 deri në 5,000 lekë të reja më shumë për siguracionin e detyrueshëm.
Për shembull, një automjet me 200 kuaj fuqi që në vitin 2024 siguracioni i kushtonte rreth 16,000 lekë, në vitin 2025 fatura ka arritur në jo më pak se 20,000 lekë. Kjo tregon qartë tendencën e rritjes së çmimeve dhe pasigurinë që po shoqëron tregun e siguracioneve në vend, duke bërë që shumë drejtues mjetesh të ndihen të mbingarkuar financiarisht.