Gjykata e Tiranës ka vendosur të lërë në fuqi masat e sigurisë ndaj disa zyrtarëve të Bashkisë Tiranë dhe Inspektoratit të Mbrojtjes së Territorit (IMT), të cilët akuzohen për shpërdorim detyre dhe falsifikim dokumentesh në lidhje me procesin e shembjes së pallateve të dëmtuara nga tërmeti në zonën e Kombinatit.
Sipas vendimit të gjykatës, Aurel Çuko, Aurel Boriçi dhe Sokol Qehajaj do të vijojnë të qëndrojnë në arrest shtëpie, ndërsa ndaj Eleana Guçes, Rexhina Rakipit, Aleksandra Mahmutllarit, Shyqyri Malokut dhe Fatmir Firit është caktuar masa e sigurisë “detyrim për t’u paraqitur”.
Hetimi i Prokurorisë së Tiranës ka nisur pas dyshimeve për një rast konkret, ku një pallat në Kombinat, i prishur në janar të vitit 2020 me mjetet dhe fondet e Bashkisë së Tiranës, është rifutur më pas në një procedurë tenderimi, bashkë me 14 ndërtesa të tjera që rezultonin për shembje si të dëmtuara nga tërmeti.
Sipas prokurorisë, pallati nr. 140 nuk ka qenë rasti i vetëm problematik. Hetimet kanë zbuluar dyshime se edhe pesë ndërtesa të tjera janë paguar për t’u shembur, ndonëse ato rezultonin të ishin tashmë të rrafshuara, duke ngritur dyshime serioze për pagesa fiktive dhe manipulim të dokumentacionit zyrtar.
Autoritetet hetimore vijojnë punën për zbardhjen e plotë të skemës së dyshuar, ndërsa çështja konsiderohet me interes të lartë publik, për shkak të përfshirjes së fondeve shtetërore të destinuara për pasojat e tërmetit dhe përgjegjësisë institucionale të zyrtarëve vendorë.