Operacioni i SPAK që çoi në goditjen e drejtuesve të AKSHI-t dhe grupit që kontrollonte dhjetëra milionë euro tendera publikë, po rezulton një nga hetimet më të mëdha dhe më domethënëse që nga krijimi i Prokurorisë së Posaçme.
Gazetari Emirjon Senja deklaroi në emisionin “Në Shënjestër” se vetëm gjatë viteve të fundit kompanitë e përfshira në këtë skemë kanë qarkulluar rreth 145 milionë euro tendera, ku kryesore janë Advanced Business Solution e Gerond Meçes dhe Soft & Solution e Ermal Beqirit.
Së bashku me kompaninë Horizon, dyshohet se ato kanë qenë në qendër të skemës së shpërndarjes së prokurimeve të AKSHI-t në pak duar.
Sipas gazetarit, SPAK po verifikon gjithashtu rolin e plotë të kompanisë së Meçes, e cila ka përfituar rreth 55 milionë euro tendera nga AKSHI gjatë viteve të fundit.
Krahas hetimit të procedurave dhe mënyrës se si janë ndarë kontratat, Prokuroria e Posaçme ka kaluar tashmë në fazën e ndjekjes së gjurmëve financiare.
Senja bëri të ditur se SPAK po verifikon se ku kanë përfunduar paratë e siguruara nga grupi në fjalë përmes tenderave të AKSHI-t. Sipas tij, hetuesit po analizojnë gjurmë financiare që çojnë deri te një kullë në Tiranë, pas disa komunikimeve të gjetura mes personave nën hetim dhe një biznesmeni të njohur ndërtimi, ndërsa paralelisht janë kryer kontrolle edhe në një biznes ndërtimi në pronësi të z. Merkaj, siç njoftoi dhe SPAK përmes njoftimit për shtyp.
Hetimi pritet të zgjerohet më tej, ndërsa SPAK po ndërton zinxhirin e plotë të rrjedhës së parave, kontratave dhe përfitimeve të dyshuara, që sipas burimeve mund të zbulojnë një nga skemat më të sofistikuara të abuzimit me fondet publike në institucionet e teknologjisë së shtetit.
