Komunikoi me një vajzë në rrjete sociale, dhunohet me shkop bejsbolli polici 19-vjeçar në Krujë.
Një ngjarje e rëndë me protagonist një punonjës policie u shënua mbrëmjen e kaluar në Krujë. A.B., me detyrë punonjës i Patrullës, është goditur mbrëmjen e kaluar nga një person me maskë dhe shkop bejsbolli. Nga hetimet e para ka rezultuar se punonjësi i policisë ka pasur komunikime me një vajzë në rrjetin social Instagram dhe ky fakt është mësuar nga njerëzit e vajzës.
Dyshimet janë se vëllai i vajzës nuk e ka pranuar këtë fakt dhe ka dhunuar policin 19-vjeçar. Ndërsa vajza me të cilën ai komunikonte është ende pa mbushur 18 vjeç. Pas kallëzimit të punonjësit të policisë, kanë nisur hetimet dhe gjatë këqyrjes së kamerave të sigurisë, është gjetur makina me të cilën lëvizte dhunuesi. Familjarët e tjerë të vajzës s’kanë pranuar të kenë lidhje me ngjarjen. Hetimet janë duke vijuar.
