Gjykata e Apelit Tiranë ka vendosur të lërë në fuqi masën e sigurisë “arrest me burg” për Gjon Shkambin, xhaxhain e autorit të vrasjes së gjyqtarit Astrit Kalaja, si dhe për Banush Koxhajn, punonjësin e sigurisë në gjykatë.
Kështu, kërkesa e bërë nga Gjon Shkambi për një masë më të butë sigurie u rrëzua, ndërsa edhe ankimi i bërë nga Koxhaj nuk u pranua nga trupa gjykuese.
Të dy do të vazhdojnë të qëndrojnë në paraburgim, në pritje të përfundimit të hetimeve për ngjarjen e rëndë të ndodhur më 6 tetor, kur Elvis Shkambi, nipi i Gjonit, vrau gjyqtarin Astrit Kalaja brenda ambienteve të Gjykatës së Apelit Tiranë, pasi ky i fundit kishte dhënë një vendim kundër familjes Shkambi.
Në të njëjtën ngjarje mbetën të plagosur babë e bir, Ragip dhe Ervis Kurtaj, pjesë e palës kundërshtare në procesin gjyqësor.
