Një kompleks në vijën e parë të plazhit, tek Rana e Hedhun në Shëngjin dyshohet se është ndërtuar pa leje dhe me dokumente pronësie të falsifikuara. Hetimi i Prokurorisë së Lezhës çoi në arrestimin e pronarit Pjetër Tuçi, ndërsa disa zyrtarë dhe ish-zyrtarëve të Kadastrës, IKMT-së dhe Policisë janë nën hetim.
Gjykata ka caktuar masat arrest shtëpie për Gentjan Malotaj, ish-drejtor i Kadastrës së Lezhës, Artur Shabaku, ish-shef i sektorit të Legalizimeve, dhe punonjësit Admir Maxhuni, Luiza Bala dhe Hekuran Xhina. Ndërkohë, dy ish-drejtues të IKMT-së, Flor Gjini dhe Kol Malai, janë ndaluar të dalin jashtë territorit të Republikës së Shqipërisë. Po ashtu, polici i zonës së Shëngjinit, Martin Ndoka, është pezulluar nga detyra dhe i është ndaluar dalja jashtë vendit. Masat e sigurisë të caktuara nga Gjykata e Lezhës janë ekzekutuar nga policia vendore, ndërsa hetimet janë drejtuar nga prokurorja Iva Harka.
Burime hetimore bëjnë me dije se çështja lidhet pikërisht me këtë ndërtesë tek Rana e Hedhun, të cilën Tuci e ka ndërtuar pa leje dhe duke falsifikuar dokumentet e pronësisë së tokës. Jo vetëm kaq, por ndërtesa pa leje është legalizuar në mënyrë të parregullt nga regjistruesit e hipotekës. Ndaj këtyre 4 objekteve është vendosur sekuestro preventive nga gjykata.
Po këtë të mërkurës, policia ka finalizuar operacionin “Harta”, ku janë konfiskuar 13 pasuri të paluajtshme me sipërfaqe totale 83 497 m². Ato ndodhen tek Rana e Hedhun, Ishull Lezhë, Tale dhe Vain. Konfiskimi është kryer në zbatim të një vendimi të Gjykatës së Posaçme Kundër Korrupsionit dhe Krimit të Organizuar pasi është provuar se pasuritë janë përfituar nga veprimtari kriminale.
Zona bregdetare e Lezhës është një tokë e lakmuar ku prej vitesh është ndërtuar pa kriter dhe në shkelje të ligjit. Para një viti, Gjykata e Posaçme Kundër Korrupsionit dhe Krimit të Organizuar dënoi me 1 vit e 4 muaj burg, ish-kryebashkiakun e Lezhës Fran Frrokaj. Ai u gjet fajtor për veprën penale të “Shpërdorimit të detyrës” për tjetërsimin e një sipërfaqeje toke në zonën e Ranës së Hedhun. Gjykata po ashtu caktoi si dënim alternativ heqjen e të drejtës për ushtrimin e funksioneve publike për një periudhe 5-vjeçare.
Emrat e personave për të cilët janë ekzekutuar urdhër arrestet
Gentjan Malotaj, ish-drejtor i ASHK – “Shpërdorim detyre” – arrest shtëpie
Artur Shabaku, ish-përgjegjësi i legalizimeve pranë ASHK – “Shpërdorim detyre” – arrest shtëpie
Admir Maxhuni, përgjegjësi i legalizimeve pranë ASHK – “Shpërdorim detyre” – arrest shtëpie
Luiza Bala – inxhiniere konstruksioni – “Falsifikim dokumentesh” – arrest shtëpie
Hekuran Xhina – inxhinier ndërtimi – “Falsifikim dokumentesh” – arrest shtëpie
Flor Gjini – ish Drejtor i Drejtorisë Rajonale të IKMT – “Shpërdorim detyre” – “Ndalimi i daljes jashtë shtetit”
Kol Malaj – ish Drejtor i Drejtorisë Rajonale të IKMT Lezhë – “Shpërdorim detyre” – “Ndalimi i daljes jashtë shtetit”
Martin Ndoka – Ndihmës Specialist i Policimit në Komunitet (SPZ) – “Shpërdorim detyre” – “Pezullimi i ushtrimit të një detyre publike”
Pjetër Tuci – “Ndërtim i paligjshëm” dhe “Falsifikim i vulave, stampave ose formularëve” – “Arrest në burg”