Pengmarrje, dhunë, shantazh dhe tërheqje me forcë nga tenderët publikë. Ky është skandali i rëndë që SPAK ka zbuluar në Agjencinë Kombëtare të Shoqërisë së Informacionit (AKSHI), pas një hetimi të thelluar që ka çuar në masa të forta sigurie ndaj zyrtarëve të lartë dhe biznesmenëve.
Sipas vendimit të Gjykatës, drejtoresha e AKSHI-t, Mirlinda Karçanaj, është dërguar nën masën “arrest në shtëpi”, ndërsa e njëjta masë është caktuar edhe për zv.drejtoreshën e AKSHI-t, Hava Delibashi.
Ndërkohë, masa e sigurisë “arrest me burg” është caktuar për biznesmenët Ergys Agasi dhe Ermal Beqiri, ndërsa masa ndaluese është dhënë për Andis Papa dhe Gëzim Hoxha.
Gjithashtu, është vendosur pezullimi nga detyra për zv.drejtorin e Policisë së Tiranës, Erjon Ismaili.
Pengmarrja e biznesmenit Gerond Meçe
Nga hetimet e SPAK rezulton se Ergys Agasi dhe Ermal Beqiri, në bashkëpunim mes tyre, kanë marrë peng biznesmenin Gerond Meçe, një nga operatorët ekonomikë që rezultonte fitues i shpeshtë i tenderëve të AKSHI-t.
Sipas dosjes hetimore, pas shantazheve dhe ushtrimit të dhunës për disa orë me radhë, Meçe është detyruar të heqë dorë nga gara, duke u tërhequr nga të gjitha tenderët dhe ankimimet që kishte paraqitur pranë AKSHI-t. Këto fakte janë dokumentuar nga SPAK përmes këqyrjes së telefonave celularë, kamerave të sigurisë dhe provave të tjera direkte dhe indirekte.
Favorizime sistematike dhe dhjetëra tendera
SPAK ka konstatuar se drejtoresha dhe zv.drejtoresha e AKSHI-t kanë favorizuar kompanitë e Ermal Beqirit, duke i kaluar dhjetëra tendera me vlera të konsiderueshme, në shkelje të barazisë së pjesëmarrësve në procedurat publike.
Për Ergys Agasin dhe Ermal Beqirin rëndojnë akuzat për:
- konkurrencë të paligjshme përmes dhunës
- heqje të paligjshme të lirisë
- grup të strukturuar kriminal
- kryerje veprash penale në kuadër të grupit të strukturuar kriminal
- pastrim parash
- si dhe vepra të tjera penale
Ndërsa për drejtueset e AKSHI-t rëndon akuza e shkeljes së barazisë në tendera, e kryer në bashkëpunim.
Kontrolle masive dhe pista e pastrimit të parave
Në kuadër të këtij operacioni, janë ushtruar dhjetëra kontrolle në banesa dhe ambiente të ndryshme, me qëllim sigurimin e provave shtesë.
Kontrolle janë ushtruar edhe në bizneset e Klajdi Merkajt, i arrestuar më herët si pjesë e organizatës kriminale të Franc dhe Hajdar Çopjas. Sipas hetuesve, ka dyshime të forta se përmes bizneseve të Merkajt janë pastruar miliona euro, të përfituara nga tenderët e AKSHI-t.
Dy tenderë kyç dhe rrezik për të dhëna sensitive
SPAK po heton në mënyrë të posaçme dy tenderë tejet problematikë:
- Tenderin për mirëmbajtjen e Thesarit të Shtetit, ku dyshohet se grupi i strukturuar kriminal kishte akses në të dhëna dhe transaksione financiare brenda dhe jashtë vendit, për shtetas shqiptarë e të huaj, kompani private dhe persona të ekspozuar politikisht.
- Tenderin për administrimin e dosjeve gjyqësore, ku sipas SPAK dyshohet se grupi kishte akses në dosje gjyqësore, caktimin e gjyqtarëve dhe ecurinë e çështjeve, për shkak të fitimit të tenderit të mirëmbajtjes.
Gjithashtu, janë identifikuar të paktën 10 procedura të tjera tenderuese, të cilat po hetohen, pasi dyshohet se janë shoqëruar me transaksione financiare të konsiderueshme dhe blerje pasurish luksoze.
Në një rast, SPAK ka zbuluar blerjen e një jahti me vlerë rreth 1 milion euro, të regjistruar në emër të një shtetaseje rumune 24-vjeçare, e cila rezulton të ketë lidhje me Ermal Beqirin.
Hetimet vijojnë
Kontrollet po vijojnë edhe ndaj zyrtarëve të tjerë të AKSHI-t, kryesisht anëtarë të Komisionit të Vlerësimit të Ofertave dhe të shqyrtimit të ankesave, si dhe ndaj personave të lidhur me biznesmenët e shpallur në kërkim, përfshirë familjarë dhe banesa në pronësi të tyre.
SPAK pritet të thellojë më tej hetimet në atë që konsiderohet një nga skandalet më të rënda që ka prekur tenderët publikë, sigurinë e të dhënave shtetërore dhe sistemin e drejtësisë.
Në kuadër të hetimit për dyshime serioze për abuzime me tenderët e AKSHI, SPAK ka firmosur 8 masa sigurie, konkretisht:
- Arrest në burg për Ergys Agasin
- Arrest në burg për Ermal Beqirin
- Arrest në shtëpi për Mirlinda Karçanajn, drejtoreshë e AKSHI-t
- Arrest në shtëpi për Hava Delibashin, zv.drejtoreshë e AKSHI-t
- Pezullim nga detyra dhe ndalim për të dalë jashtë vendit për Erion Ismailin
- Ndalim për të dalë jashtë vendit për Andis Papa
- Ndalim për të dalë jashtë vendit për Gëzim Hoxhën
- Ndalim për të dalë jashtë vendit për Rogers Rrytën