Një 49-vjeçar është arrestuar nga Policia e Tiranës ndërsa dy të tjerë janë shpallur në kërkim lidhur me një sherr të ndodhur më 6 dhjetor në zonën e Freskut, ku mbeti I dëmtuar me sende të forta, 26-vjeçari me iniciale F. Y.
Në pranga ka rënë Helidon Marku me precedent edhe për armëmbajtje pa leje. Ndërsa në kërkim u shpallën Gjoke Ndrevataj dhe Xhemal Uka me precedentë penal për krime kundër personit.
Nga këto veprime rezultoi se Gjoke Ndrevataj dhe Xhemal Uka për motive të dobëta, kanë porositur shtetasin Helidon Marku, për të kryer rrahjen e , 26-vjeçari me iniciale F. Y, shkruan Report Tv.
Një konflikt i nisur në rrjetin social TikTok, gjatë kohës që Gjokë Ndrevataj, i njohur me emrin “Aron”, ishte live duke komunikuar me ndjekësit, gati sa nuk përfundoi në tragjedi mbrëmjen vonë të 6 dhjetorit në Tiranë. Një 26-vjeçar u rrah, duke i shkaktuar dëme të shumta në trup, vetëm se i komentoi Aronit dhe e shau në live-n e tij. I ndjerë i fyer, personazhi i njohur për shumë të rinj që navigojnë në TikTok-un e paligjshëm në Shqipëri, porositi bashkë me Xhemal Ukën, i njohur si “Fire” në rrjetet sociale, një person me precedent të theksuar kriminal për dhunimin e të riut, Helidon Marku, 49 vjeç.
Ngjarjen e rëndë, dikush u kujdes ta dokumentonte, pasi gjatë goditjes në kokë me çekiç në zonën pranë rrethrrotullimit të Freskut, e filmoi për t’a dërguar Gjokë Ndrevatajt, i cili më vonë e publikoi në rrjetin e tij social në TikTok. 26-vjeçari mësohet së ka pësuar dëme të shumta, demtim të kafkës, e cila mund t’i lërë pasoja në vijim.
Agjentët e Komisariatit nr. 4 në Tiranë, pasi identifikuan porositësit, Aron dhe Fire, për disa ditë hetuan për autorin e ngjarjes, i cili rezulton të jetë nga Shkodra. Helidon Marku u ndalua në banesën e tij në Shkodër, ndërsa komunikimi i arrestit iu bë në Tiranë. Ai rezulton personazh problematik me ligjin, pasi më herët ka shlyer një dënim prej 11 vjet e 8 muaj për plagosjen e 4 marokenëve dhe 2 shqiptarëve në Itali. Në Shqipëri, Marku rezulton i dënuar me 6 vjet burg edhe për armë pa lejë dhe shpërndarje të drogës.
Në hetim në gjendje të lirë u mor edhe një 33-vjeçar, i cili shoqëroi Markun gjatë kohës së dhunës dhe ka refuzuar t’i tregojë policisë në lidhje me ngjarjen. Kjo nuk është hera e parë që Gjokë Ndrevataj, i njohur në TikTok me emrin “Aron” përfshihet në porosi për dhunimin e personave të tjerë të cilët e fyejnë apo shajnë gjatë kohës që del live. Burime bëjnë me dije se më herët ka porositur rrahjen edhe të personave të tjerë.