Një ngjarje e rëndë është shënuar mbrëmjen e djeshme rreth orës 22:30 në ambientet e kompleksit “Delijorgji” në Tiranë, ku është dhunuar brutalisht pronari i restorantit “Tokyo”, Laert Kasaj.
Sipas burimeve, Kasaj është sulmuar nga disa persona, të cilët dyshohet se janë pronarët e barit “Stockholm”, lokal që ndodhet përballë kompleksit. Konflikti mes tyre mësohet se ka degraduar në përleshje fizike, ku janë përdorur grushte dhe dhunë e konsiderueshme ndaj viktimës.
Policia ka identifikuar dy nga autorët e dyshuar, Ferhat Kaja dhe vëllai i tij, të cilët janë shpallur në kërkim. Sipas informacioneve paraprake, shkak i konfliktit mund të jetë bërë një kallëzim i mëparshëm që Laert Kasaj kishte bërë ndaj tyre, ndërsa në momentin e sulmit njëri nga autorët i është drejtuar viktimës me fjalët: “Pse më ke denoncuar?”
Hetimet janë në vijim për të zbardhur plotësisht rrethanat e ngjarjes, ndërsa uniformat blu janë vënë në ndjekje të autorëve të dyshuar.