Vrasja e Frrok Lleshajt, ndodhur në fshatin Paçram të Vaut të Dejës, vijon të hetohet intensivisht, ndërsa kanë dalë në dritë detaje të reja tronditëse.
Pamjet nga kamerat e sigurisë tregojnë momentin kur dy persona me motor, me targa të huaja që rezultojnë të vjedhura, mbërrijnë në vendin e ngjarjes me skafandra në kokë, për të mos u identifikuar. Autorët e kanë pritur viktimën në një kthesë, në një pikë ku kamerat nuk kapin pamje të qarta të ekzekutimit.
Megjithatë, falë funksionit të audios, dëgjohet momenti kur fillimisht qëllohet dy herë me pistoletë. Arma ngec dhe, sipas dyshimeve të hetuesve, autorët përdorin një pistoletë të dytë, duke e qëlluar Lleshajn edhe shtatë herë të tjera.
Pas atentatit, autorët largohen me motor duke ndjekur rrugën në drejtim të Tiranës. Hetimet tregojnë se motorri është ndjekur nga kamerat deri në zonën e Laçit, ndërsa në Fushë-Kuqe humbin gjurmët. Janë sekuestruar kamerat e sigurisë përgjatë gjithë këtij aksi rrugor, dhe grupi hetimor shpreson që autorët të kenë bërë ndonjë gabim që mund të ndihmojë në identifikimin e tyre.
Frrok Lleshaj, ish-punonjës policie, ishte liruar nga burgu në vitin 2023, pasi kishte vuajtur pjesërisht një dënim prej 25 vitesh për vrasje. Dyshohet se motive hakmarrjeje që e kanë zanafillën tri dekada më parë — dhe që kanë shkaktuar pesë viktima — qëndrojnë pas këtij ekzekutimi të përgjakshëm.
