Arrestohet i dehur në timon Martin Mane djali i Samir Manes
Djali i biznesmenit Samir Mane është arrestuar nga Policia Rrugore e Tiranës, pasi duke drejtuar mjetin në gjendje të dehur shkaktoi një aksident me dëme materiale dhe u konfliktua me efektivët.
Ngjarja ndodhi tre ditë më parë në rrugën “Xhorxh Bush”, pranë Parlamentit. 28 vjeçari përplasi dy makina të parkuara dhe u largua nga vendi i aksidentit, por u ndalua disa metra më tej nga policia. Sipas njoftimit zyrtar, ai kundërshtoi kryerjen e testit të alkoolit, por testi u krye dhe rezultoi se ishte në gjendje të dehur.
“Sektori i Qarkullimit Rrugor arrestoi në flagrancë M.M., 28 vjeç, pasi ka përplasur 2 automjete të parkuara dhe është larguar nga vendi i aksidentit. Pas ndalimit nga punonjësit e Policisë, ai i kundërshtoi për testin e alkoolit, nga i cili rezultoi në gjendje të dehur. Materialet procedurale i kaluan Prokurorisë për veprime të mëtejshme”, thuhet në njoftimin e policisë.
Efektivi që trajtoi rastin, Azbi Spahiu, bie nga pallati pas presioneve
Pak orë pas ngjarjes, një efektiv i Policisë Rrugore, Azbi Spahiu, 57 vjeç, ra nga kati i shtatë i një pallati dhe u dërgua në gjendje të rëndë në spitalin e Traumës. Gazetarja Klodiana Lala deklaroi se Spahiu ishte pjesë e grupit të policëve që ndaluan djalin e Samir Manes dhe më pas është thirrur nga AMP, ku i është kërkuar llogari për veprimet e kryera.
Sipas Lalës, para se të hidhej, Spahiu i ka dërguar mesazhe të birit ku shkruante se “po i shkatërronin karrierën”.
“Azbi Spahiu trajtoi rastin e djalit të Samir Manes. Ai u thirr në AMP dhe i është kërkuar llogari për procedurat. Gjendur në kushte presioni, ai i ka shkruar të birit se po i shkatërronin karrierën dhe më pas është hedhur nga lartësia. Ngjarja kërkon hetim të menjëhershëm”, deklaroi Lala.
Ajo shtoi se djali i biznesmenit, pasi u arrestua, është transferuar në spital duke pretenduar se nuk ndihej mirë, dhe të nesërmen është liruar nga prokurori që ka konsideruar arrestimin të paligjshëm.
Lala nënvizoi se policia dhe AMP nuk kanë dhënë ende shpjegime të qarta për procedurën e ndjekur ndaj të riut dhe për arsyet e thirrjes së efektivit Spahiu, ndërsa mungesa e transparencës ka shtuar dyshimet.
“Azbiu është hallka më e dobët. Heshtja e institucioneve e bën edhe më të paqartë situatën. Duhet hetim si për arrestimin e djalit të Manes, ashtu edhe për presionet ndaj efektivit”, theksoi gazetarja.
Në spital, gjendja e 57-vjeçarit raportohen se është stabilizuar. Ngjarja ka hapur një debat të fortë për presionin ndaj punonjësve të policisë dhe trajtimin e rasteve ku përfshihen persona me influencë.