Tregu i sigurimeve motorike në Shqipëri vijon të rritet ndjeshëm në aspektin e të ardhurave, por jo në atë të dëmshpërblimeve të paguara për qytetarët. Sipas të dhënave zyrtare të Autoritetit të Mbikëqyrjes Financiare (AMF), në periudhën janar – korrik 2025, kompanitë e sigurimeve arkëtuan mbi 90 milionë euro nga primet e sigurimeve motorike, çka përbën rreth 12 milionë euro më shumë se në të njëjtën periudhë të vitit 2024.
Megjithatë, shifra e dëmshpërblimeve të paguara mbetet shumë më e ulët: vetëm 23 milionë euro, ose rreth një e katërta e të ardhurave, duke ngjallur shqetësime mbi mënyrën sesi kompanitë i kthejnë qytetarëve detyrimet në rast aksidentesh apo dëmesh.
SIGAL – më i madhi në treg, por me më pak kompensime
Në krye të tregut qëndron kompania SIGAL, e cila vetëm nga sigurimet motorike realizoi mbi 20 milionë euro të ardhura në shtatëmujorin e parë të këtij viti. Por, sipas AMF, kompania ka paguar 8,37% më pak dëmshpërblime se një vit më parë, ndonëse primet e mbledhura janë rritur. Ky disproporcion ngre pikëpyetje mbi mënyrën e trajtimit të kërkesave për dëmshpërblim dhe transparencën e procedurave.
INTERSIG – ulje e theksuar e dëmshpërblimeve
Edhe më problematike paraqitet situata në kompaninë INTERSIG, e cila rezulton se ka paguar 33,68% më pak dëmshpërblime krahasuar me periudhën janar – korrik 2024. Ky reduktim drastik përkon me një periudhë rritjeje të tregut dhe ngrit pyetje mbi praktikat e kompanisë në lidhje me shlyerjen e dëmeve.
Problematikat e tregut
Ekspertët e tregut të sigurimeve theksojnë disa problematika të dukshme:
• Disproporcioni mes të ardhurave dhe dëmshpërblimeve – kompanitë arkëtojnë çdo vit më shumë, por përfitimet reale të qytetarëve janë minimale.
• Transparenca e ulët në proceset e shlyerjes – qytetarët shpesh ankohen për vonesa, burokraci dhe zvarritje në kompensime.
• Mungesa e konkurrencës reale – tregu është i dominuar nga pak kompani të mëdha, çka i jep atyre hapësirë për të ndjekur politika më pak miqësore ndaj konsumatorëve.
• Roli i AMF – megjithëse publikon të dhënat, ngrihen pikëpyetje mbi sa efikase është në kontrollin e kompanive dhe mbrojtjen e interesave të të siguruarve.
Në dëm të konsumatorit
Në fund, pasqyrat financiare tregojnë se qytetarët shqiptarë paguajnë çdo vit më shumë për sigurimet motorike – një detyrim ligjor – ndërkohë që përfitimet e tyre në rast aksidenti janë gjithnjë e më të kufizuara. Ky kontrast e kthen tregun e sigurimeve në një nga sektorët më të diskutueshëm për mungesën e balancës mes arkëtimeve dhe shërbimit ndaj konsumatorit.