Prej më shumë se tre muajsh, një 30-vjeçar shqiptar nga Shkodra rezulton i zhdukur në Spanjë, duke lënë pas shumë pikëpyetje mbi fatin e tij. Bëhet fjalë për Miklovan Danaj, i lindur në Gur të Zi, Shkodër, i cili prej datës 11 maj nuk ka dhënë më asnjë shenjë jete.
Familjarët e tij, të dëshpëruar, kanë nisur kërkimet në të gjitha drejtimet në Spanjë, ku dyshohet se ndodhej ditën e zhdukjes, por edhe në Shqipëri e Itali, pasi Miklovani kishte kaluar pjesën më të madhe të jetës në qytetin e Pisës.
Përveç mungesës totale të kontakteve, familjarët janë përballur edhe me një zhvillim të frikshëm, një person i panjohur u ka dërguar një mesazh ku thuhej: “Miklovani është vrarë, mos e kërkoni”. Ky mesazh ka shtuar edhe më shumë dyshimet se i riu mund të ketë qenë viktimë e një ngjarjeje kriminale.
Burime bëjnë me dije se ai, i njohur ndryshe edhe me nofkën “Keli”, kishte hyrë në rrugën e trafikut të drogës, kryesisht kokainë. Pas largimit nga Italia, ku jetonte me familjen për shumë vite, ai ishte vendosur në Marbella, një qytet i njohur për luksin, por edhe për aktivitetin e grupeve kriminale ndërkombëtare. Pikërisht kjo e bën zhdukjen e tij edhe më të dyshimtë.
Deri tani, autoritetet në Spanjë nuk kanë dhënë asnjë njoftim zyrtar mbi hetimet apo gjurmët e mundshme që lidhen me Danajn. Familja e tij, nga ana tjetër, kërkon ndihmën e institucioneve shqiptare dhe italiane, pasi beson se rasti i tij mund të jetë i lidhur me rrjete ndërkombëtare kriminale që veprojnë në zonën e Costa del Sol.
Ndërkohë që ditët kalojnë, bashkëshortja dhe famiëja e Miklovanit vazhdojnë të kërkojnë informacione kudo, duke mos hequr dorë nga shpresa se ai mund të jetë gjallë. Por, mesazhi kërcënues dhe e kaluara e tij në botën e krimit i mbajnë dyshimet e forta për një fund tragjik.
