Konfirmohet zyrtarisht se në vrasjen e Frrok Lleshajt janë përdorur dy armë të ndryshme. Policia thote se në vendin e ngjarjes janë gjetur gëzhoja të armëve të ndryshme dhe ka dyshime se njëra nga armët është bllokuar, ndërsa autorët kanë përdorur armën e dytë.
Lidhur me autorët e vrasjes, motori që ata kanë përdorur nuk është gjetur ende nga policia. Gjurmët e tyre janë ndjekur deri në Laç dhe prej aty nuk ka të dhëna të tjera. Policia po heton pistën e gjakmarrjes dhe ka shoqëruar të paktën 10 persona, të cilët janë marrë në pyetje e më pas janë lënë të lirë.
Dyshohet se familjet në konflikt mund të kenë paguar persona të tjerë për të kryer vrasjen në fshatin Paçram të Vaut të Dejës. Ish-polici ishte dënuar me 25 vjet burg për vrasje dhe ishte liruar nga burgu në vitin 2023. Ai ishte në hasmëri me dy familje dhe nga këto konflikte janë vrarë 5 persona.
