Gjykata e Juridiksionit të Përgjithshëm të Apelit në Tiranë mori te mërkurën vendimin mbi masat e sigurisë të ankimuara nga 10 të akuzuar të çështjes së evazionit fiskal ndaj kompanisë “Bankers Petroleum”, duke lënë në fuqi masat më të rënda për drejtuesit kryesorë të saj.
Apeli konfirmoi “arrestin me burg” për Drejtorin e Përgjithshëm të “Bankers Petroleum”, shtetasin kinez Hong Ping Xiao, si dhe për ish-drejtorin Leonidha Çobo, duke rrëzuar kërkesën e tyre për një masë më të butë sigurie.
Nga shyrtimi gjatë seancës se djeshme, që zgjati mbi 6 orë për shkak të numrit të lartë të të arrestuarve, Apeli vendosi të mërkurën të zbusë masën e sigurisë për Diona Gogën, nga “arrest shtëpie” në “detyrim paraqitje”, duke marrë parasysh faktin se ajo është nënë e një fëmije të vogël.
Gjithashtu, për të pandehurit Majlinda Thana, Matilda Ibraliu dhe Erton Ademaj, gjykata vendosi të heqë kufizimin e ndalimit të daljes jashtë shtetit, duke lënë në fuqi vetëm “detyrimin për paraqitje”.
Nga 14 masa sigurie të lëshuara nga Gjykata e Fierit, janë ekzekutuar 10 prej tyre, ndërsa 4 punonjës të tjerë të kompanisë janë ende në kërkim.
Prokuroria e Fierit ka ngritur pesë akuza ndaj drejtuesve të “Bankers Petroleum” dhe disa zyrtarëve të administratës tatimore, mes tyre: “Krijim i skemave mashtruese lidhur me TVSH-në”, “Fshehje e të ardhurave”, “Pastrim i produkteve të veprës penale”, “Shpërdorim detyre” dhe “Moskryerje e detyrave nga organet tatimore”.
Hetimet zbuluan se kompania kishte ndërtuar për më shumë se 20 vite skema mashtrimi, duke deklaruar në mënyrë të vazhdueshme humbje dhe duke shmangur detyrimet tatimore në vlerën e 11.7 miliardë lekëve, ndonëse gjatë kësaj periudhe ka eksportuar dhe shitur naftë me një vlerë totale prej 532 miliardë lekësh. Për më tepër, “Bankers Petroleum” ka përfituar edhe rimbursim të pajustifikuar të TVSH-së.
Të pandehurit mohuan akuzat dhe kërkuan masa më të buta sigurie, duke argumentuar se nuk kanë lidhje me skemat mashtruese të pretenduara nga prokuroria.
Gjatë seancës, përfaqësuesit e ambasadës kineze kërkuan të ndjekin procesin në sallë, por nuk u lejuan nga trup gjykuesi.
