Flor Sulejmani ka paraqitur dorëheqjen nga detyra, vetëm pak kohë pasi ishte rikthyer në pozicionin e tij në krye të Agjencisë së Mbikëqyrjes Policore. Vendimi i tij vjen pas pushimit të hetimeve që ishin nisur fillimisht nga Prokuroria e Beratit dhe më pas u transferuan e u mbyllën nga Prokuroria e Tiranës.
Sulejmani ishte pezulluar disa javë më parë në kuadër të këtij hetimi, por pas vendimit për pushimin e çështjes, ai u rikthye në detyrë. Megjithatë, në mënyrë të papritur, ai ka zgjedhur të largohet duke dorëzuar zyrtarisht dorëheqjen e tij në Ministrinë e Brendshme. Mësohet se ministri Ervin Hoxha është vënë në dijeni, po ashtu edhe kryeministri Edi Rama.
Arsyet e dorëheqjes nuk janë bërë publike, ndërsa pritet që brenda pak ditësh të nisë procesi për përzgjedhjen e kreut të ri të Agjencisë së Mbikëqyrjes Policore, një strukturë e rëndësishme në kontrollin dhe hetimin e veprimtarisë së punonjësve të policisë.
