Betohem! Klodiana Spahiu konfirmon se do të firmosë ligjin që privatizon tenderat e shëndetësisë

Klodiana Spahiu ka nxituar të tregojë devotshmërinë ndaj shefit të saj duke konfirmuar se do të firmosë ligjin që privatizon tenderat e shëndetësisë tek miku izraelit i kryeministrit.

Pa pritur fare të ulet në karrigen e ministres së Shëndetësisë, zonja Spahiu ka deklaruar gjatë një takimi jo publik me stafin drejtues të QSUNT-së, dy ditë më parë, atë që dyshonin të gjithë; se ajo do të firmosë ligjin kontrovers, të cilin refuzoi ta firmoste paraardhësja e saj, Evis Sala, duke u larguar nga qeveria.

“Mos dëgjoni se çfarë thuhet nëpër media. Kjo gjë që do të bëjë kryeministri është një nga iniciativat më të mira që është bërë ndonjëherë në shëndetësi për të siguruar barnat për shqiptarët” ka thënë tekstualisht Klodiana Spahiu gjatë takimit me shefat e spitalit më të madh të vendit, duke iu referuar projektligjit.

Drafti kontrovers i qeverisë për të privatizuar tenderat e shëndetësisë sipas modelit Kayo në mbrojtje, u publikua fillimisht nga Kapitali.

Ajo që s’bëhet me profesorë, bëhet me kamikazë
Ligji për privatizimin e tenderave të shëndetësisë tek një dorë e vetme ishte arsyeja që çoi në largimin nga qeveria të ish ministres së Shëndetësisë, Evis Sala.

Pavarësisht presionit të fortë të kryeministrit, Evis Sala refuzoi të firmoste draftin kontrovers duke preferuar largimin e saj nga qeveria, ndonëse formalisht siç ndodh në këto raste, arsyet e dorëheqjes u paraqitën si personale.

Pas largimit të Salës, Edi Rama zgjodhi Klodiana Spahiun, një deputete nën influencën e madhe të kapove të Durrësit.

Dhe zonja Spahiu nuk ka vonuar të konfirmojë se do të përmbushë menjëherë detyrën për të cilën e vunë ministre të shëndetësisë duke fluturuar si një dron kamikaz.

Monopol privat i sektorit më jetik

Kali i Trojës që privatizon tenderat e shëndetësisë do të jetë një shoqëri aksionere publike, e cila replikon në mënyrë identike modelin famëkeq të Kayos edhe në sektorin shëndetësor.

“Shoqëria shtetërore ka për objekt të veprimtarisë plotësimin e nevojave të institucioneve publike të kujdesit shëndetësor për barna, pajisje mjekësore, produkte të tjera shëndetësore, mallra dhe shërbime mbështetëse, me qëllim garantimin e qëndrueshmërisë së furnizimit, përdorimin eficient dhe ekonomik të fondeve publike, si dhe sigurimin e cilësisë dhe disponueshmërisë së produkteve të furnizuara,” thuhet në draft.

Por djalli qëndron në detaje. Shoqëria publike nuk do ta bëjë e vetme furnizimin e spitaleve me ilaçe dhe pajisje mjekësore, por përmes krijimit të shoqërive të përbashkëta me privatët.

“Për realizimin e objektit të saj, shoqëria krijon shoqëri të tjera ose merr pjesë në kapitalin e shoqërive të tjera tregtare, publike ose private, që kanë si objekt prodhimin dhe/ose tregtimin e barnave, pajisjeve mjekësore, produkteve të tjera shëndetësore dhe kryerjen e veprimtarive të lidhura me to,” thuhet në draft.

Pra, një kompani e përbashkët mes shoqërisë aksionare shtetërore dhe një privati do të ketë monopolin absolut të blerjes së ilaçeve, pajisjeve mjekësore dhe llokmës së madhe qindra milionë euro të prokurimeve shëndetësore, njësoj si Timak Defence e cila ka ekskluzivitetin e furnizimit të ushtrisë me automjete dhe armë.

Përmes këtij mekanizmi qeveria praktikisht asgjëson konkurrencën në tenderat e shëndetësisë duke privatizuar de facto buxhetin e një prej sektorëve me jetik për mirëqënien e përgjithshme. Pra tashmë nuk do të ketë më tendera ku kompanitë garojnë me njëra tjetrën për të ulur çmimet, por të gjitha ilaçet dhe pajisjet spitalore do të blihen nga monopolisti publiko-privat, i cili do t’ia shesë ato shtetit nga pozita e shitësit të vetëm ekskluziv.

Vendosja e shëndetësisë nën thundrën e një monopoli privat është një çmenduri në kundërshtim të plotë, jo vetëm me kuadrin e brendshëm ligjor, por edhe me direktivat e Bashkimit Europian, pikërisht në kohën kur qeveria trumbeton hapje dhe mbyllje kapitujsh.

Sanilevich dhe Ovadia pas privatizimit
Dy ditë pas publikimit të nismës për privatizimin e tenderave të shëndetësisë, Kapitali tregoi edhe se kush qëndron pas këtij projekti.

Bëhet fjalë për biznesmenin izraelit Saniel Sanilevich, i cili është mik i afërt i kryeministrit Edi Rama dhe ka aktualisht disa biznese në Shqipëri, duke qenë aksioner edhe në bankën e parë dixhitale në vend.

Sanilevich së bashku me biznesmenen tjetër izraelite, Yardena Ovadia janë njerëzit që dyshohet se qëndrojnë pas projektit për të marrë monopolin e furnizimit të shtetit shqiptar me ilaçe dhe pajisje mjekësore.