Besa e KM! Rama shpall paketën e malave-Mitsotakis shpall paketën e ndihmës: 400 euro shtesë për pensionistët

Greqia prezanton paketën e re ekonomike: Masa për fermerët, familjet, pensionistët dhe punonjësit
GREQI – Qeveria greke ka prezantuar një paketë të re masash ekonomike dhe sociale, e cila synon rritjen e të ardhurave dhe uljen e barrës fiskale për qytetarët. Paketa u prezantua nga kryeministri Kyriakos Mitsotakis gjatë fjalimit në Qendrën e Konferencave “Vellidio”, në kuadër të Panairit Ndërkombëtar të Selanikut.

Mitsotakis e cilësoi paketën si një udhërrëfyes për vitin 2027, duke njoftuar masa që prekin fermerët, pensionistët, familjet, administratën publike dhe punonjësit e sektorit privat.

Masa të reja për fermerët dhe blegtorët
Një prej kategorive që përfitojnë nga paketa e re janë fermerët. Kryeministri grek njoftoi rritjen e pragut të patatueshëm në 20 mijë euro, një masë që sipas tij do të prekë rreth 50 mijë prodhues.

Për blegtorët, qeveria greke synon të sigurojë fonde shtesë nga Bashkimi Europian. Mitsotakis deklaroi gjithashtu se tufat e humbura do të rikthehen së shpejti.

Rritje e ndihmës për pensionistët
Pensionistët do të përfitojnë nga një rritje e ndihmës vjetore të nëntorit. Shuma do të kalojë nga 300 në 400 euro për personat mbi 65 vjeç.

Ndërkohë, në administratën publike parashikohet një bonus prej 500 eurosh për rreth 720 mijë punonjës, duke nisur nga viti 2027. Sipas Mitsotakis, kjo do të jetë një masë e përhershme dhe do të merret parasysh edhe në llogaritjen e pensionit.

Mbështetje për familjet dhe fëmijët
Në paketë janë përfshirë edhe masa të reja për familjet. Prindërit do të kenë mundësi të hapin një llogari kursimi për fëmijët gjatë dy viteve të para pas lindjes.

Shteti do të kontribuojë me të njëjtën shumë që depozitojnë prindërit, deri në një maksimum prej 1,200 eurosh në vit.

Gjithashtu, kryeministri grek njoftoi zero taksë mbi të ardhurat deri në 20 mijë euro për familjet me tre fëmijë.

Paga minimale drejt 950 eurove
Për punonjësit e sektorit privat parashikohet një ulje e mëtejshme e kontributeve të sigurimeve.

Sipas planit të qeverisë, paga minimale në Greqi pritet të arrijë në 950 euro në vitin 2027, ndërsa objektivi është që në janar 2028 të shkojë në 1,000 euro.

Synohet ulje e çmimit të energjisë
Një tjetër objektiv i qeverisë greke lidhet me çmimin e energjisë elektrike. Mitsotakis deklaroi se synohet një ulje prej 30% gjatë tre viteve të ardhshme.

Në paketën e re janë përfshirë edhe personat me aftësi të kufizuara, për të cilët u njoftua indeksimi i përfitimeve sociale.

Paketa e masave pritet të zbatohet gradualisht dhe të përbëjë një nga shtyllat kryesore të politikës ekonomike të qeverisë greke për periudhën 2027-2028.