U arrestua njëri prej ndërtuesve të një “beach bar”-i pa leje në Shën Jan të Karaburunit dhe ortaku i tij u shpall në kërkim. Por pyetja që mbetet është: kush mban përgjegjësi për lejimin e këtij ndërtimi dhe a kishte dijeni Bashkia Vlorë?

Operacioni i zhvilluar në Shën Jan të Karaburunit nxjerr sërish në pah problemin e ndërtimeve pa leje në zonat bregdetare. Policia njoftoi arrestimin e njërit prej ndërtuesve, ndërsa ortaku i tij u shpall në kërkim.

Por, përtej përgjegjësisë së dy personave që po ndërtonin objektin, lind një pyetje e drejtpërdrejtë për institucionet vendore:

A kishte dijeni kryetarja e Bashkisë Vlorë, Bruna Mersini, për këtë ndërtim?

Nëse një objekt po ndërtohej në Shën Jan, në një zonë turistike dhe të ndjeshme si Karaburuni, qytetarët kanë të drejtë të dinë nëse Bashkia Vlorë ishte në dijeni, nëse strukturat e saj e kishin konstatuar ndërtimin dhe çfarë masash ishin marrë për ta ndaluar.

Madje, sipas njoftimit të policisë, personat në fjalë ishin proceduar më parë dhe kishin tejkaluar afatin për prishjen vullnetare të objektit. Kjo e bën edhe më të rëndësishme pyetjen: si është e mundur që situata të vazhdonte deri në ndërhyrjen e Policisë dhe IKMT-së?

Ndërtuan pa leje në Karaburun, pranga Skerdi Dinaj! Në kërkim Olsen Sherifaj

Nuk bëhet fjalë për të akuzuar pa prova kryetaren e Bashkisë Vlorë. Por bëhet fjalë për përgjegjësi institucionale dhe transparencë publike.

Bruna Mersini duhet të sqarojë: A kishte dijeni për ndërtimin? Kur është informuar Bashkia? A ka pasur inspektime apo sinjalizime? Dhe cilat struktura të bashkisë kanë pasur përgjegjësi për kontrollin e territorit në këtë zonë?

Sepse qytetarët nuk kanë nevojë vetëm të shohin një fadromë që prish një objekt pa leje. Ata duan të dinë si u lejua që ai objekt të ndërtohej në radhë të parë dhe nëse dikush tjetër, përveç ndërtuesve, do të mbajë përgjegjësi