Zhduken 3 milion euro, drejtoresha e Postës Elisabeta Mataj përfundon në Prokurori
Drejtoresha e filialit të Postës Shqiptare në Durrës është shkarkuar nga detyra dhe është kallëzuar në Prokurori, pas dyshimeve për abuzime me fondet e institucionit.
Sipas njoftimit zyrtar të Postës Shqiptare, gjatë një kontrolli të brendshëm janë konstatuar parregullsi në administrimin e fondeve që lidhen me shërbimet e pagesave. Pas verifikimeve, institucioni ka marrë masa administrative ndaj punonjësve përgjegjës dhe ka referuar rastin pranë organit të Prokurorisë për hetime të mëtejshme.
Burime të cituara nga Top Channel bëjnë me dije se vlera e dyshuar e abuzimit arrin në rreth 3 milionë euro. Ndërkohë, raportohet se edhe drejtuesja e financës së filialit ka paraqitur dorëheqjen.
Posta Shqiptare ka theksuar se fondet për të cilat janë konstatuar parregullsi nuk kanë lidhje me fondet e pensioneve apo pagesat e pensionistëve. Institucioni deklaron se po bashkëpunon me organet ligjzbatuese dhe se mbetet i angazhuar në zbatimin e politikës së tolerancës zero ndaj çdo shkeljeje të ligjit.
Hetimet për rastin vijojnë, ndërsa përgjegjësitë individuale do të përcaktohen nga organet e drejtësisë.
