E PLOTË/ Si ndodhi sherri te Sky Tower mes Mirton Lika dhe Nadir Çausholli: Tentoi të më godiste
Biznesmeni Mirton Lika ka depozituar kallëzim penal ndaj biznesmenit Nadir Çausholli, pas një konflikti të ndodhur më 6 korrik 2026 në rrugën “Ibrahim Rugova” pranë godinës “Sky Tower” në Tiranë.
Sipas kallëzimit të depozituar në Komisariatin nr. 2, Lika ka deklaruar se teksa po shkonte drejt zyrës së tij, ka konstatuar disa persona duke montuar një pajisje karikimi për automjete elektrike pranë objektit. Ai pretendon se u ka kërkuar punonjësve informacion lidhur me dokumentacionin dhe lejen për vendosjen e pajisjes, pasi, sipas tij, çështja lidhej me një procedim të hapur pranë Prokurorisë së Tiranës.
Në kallëzim thuhet se një pajisje e ngjashme, e vendosur më herët në të njëjtën zonë, ishte sekuestruar nga autoritetet kompetente si e paligjshme. Sipas Likës, punonjësit nuk kanë paraqitur dokumentacionin përkatës dhe më pas në vendngjarje është njoftuar policia.
Në zonë ka mbërritur fillimisht një patrullë e Policisë së Shtetit, e cila ka kryer verifikimet paraprake dhe më pas ka njoftuar Policinë Bashkiake, pasi çështja lidhej me ndërprerjen e punimeve dhe dokumentacionin administrativ.
Biznesmeni pretendon se gjatë kohës që priste mbërritjen e Policisë Bashkiake, Nadir Çausholli iu afrua në mënyrë kërcënuese dhe më pas situata degradoi në konflikt verbal. Sipas kallëzimit, Çausholli goditi me shqelm një karrige në drejtim të Likës, i cili pretendon se arriti t’i shmangej goditjes. Në denoncim thuhet gjithashtu se pati fyerje dhe sharje ndaj tij.
Lika ka kërkuar nga organet ligjzbatuese marrjen e masave dhe hetimin e plotë të ngjarjes, duke deklaruar se ndihet i kërcënuar personalisht, si edhe për familjen dhe aktivitetin e bizneseve “Sky Hotel” dhe “Sky Tower”.
Grushta në mes të Bllokut! Nadir Çausholli i CFO Pharma kallëzohet për kanosje
Mirton Lika është bashkëpronar i “Sky Tower” në Tiranë dhe Konsull i Sri Lankës në Shqipëri.
Ndërkohë, emri i Nadir Çaushollit është përmendur edhe më herët në një çështje tjetër hetimore. Pak muaj më parë, Prokuroria e Tiranës vendosi masa sigurimi për disa punonjës të kompanisë “CFO Pharma”, të dyshuar për përfshirje në një skemë mashtrimi me rimbursimin e barnave.
Sipas hetimeve, dëmi financiar ndaj shtetit fillimisht u vlerësua rreth 700 mijë euro, ndërsa më pas Fondi i Sigurimit të Detyrueshëm të Kujdesit Shëndetësor deklaroi se vlera e dyshuar e dëmit mund të kalojë 2.3 milionë euro.
