Jep dorëheqjen drejtori i Policisë së Tiranës, Elton Alushi
Drejtori i Policisë së Tiranës, Elton Alushi, ka dhënë dorëheqjen nga detyra, duke lënë vakant një prej posteve më të rëndësishme në strukturat e Policisë së Shtetit.
Alushi ishte emëruar në krye të Policisë së Tiranës më 14 nëntor 2024, ndërsa largimi i tij vjen pas një periudhe më pak se dyvjeçare në këtë detyrë.
Burime bëjnë me dije se tashmë ka nisur procesi për zëvendësimin e tij, ndërsa emri i drejtuesit të ri ende nuk është bërë i ditur.
Deri më tani nuk janë bërë publike arsyet zyrtare të dorëheqjes së Alushit, por burime pranë strukturave policore bëjnë me dije se largimi mund të lidhet me performancën në detyrë, si edhe me pritshmëritë dhe objektivat e vendosura gjatë ushtrimit të funksionit.
Pritet që në ditët në vijim të ketë një reagim zyrtar nga Policia e Shtetit lidhur me dorëheqjen dhe hapat për emërimin e pasuesit në krye të Policisë së Tiranës.