Dalën detaje të reja nga operacioni i Policia e Shtetit në Saranda, i cili çoi në arrestimin e 8 personave dhe ndalimin e 4 punonjësve të policisë, në kuadër të hetimeve për një ndërtim pa leje në një zonë plazhi.
Hetimet kanë zgjeruar dyshimet se prona ku po kryheshin punimet mund të jetë pjesë e një aktiviteti të një grupi kriminal me bazë në Kamëz, i cili dyshohet se është i përfshirë edhe në ngjarje të tjera kriminale në zonën e Sarandës.
Sipas burimeve hetimore, objekti ku po ndërtohej një beach bar dyshohet se është ngritur në një pronë të lidhur me Isuf Jaçaj, i vrarë më herët në një atentat me eksploziv në automjetin e tij në tetor të vitit 2025, çka ka shtuar dyshimet për lidhje mes ngjarjeve kriminale.
Në fokus të hetimeve është edhe mënyra se si është lejuar ndërtimi, ku dyshohet se janë përfshirë edhe punonjës policie, përmes marrjes së ryshfetit për mosndërhyrje ndaj punimeve të paligjshme.
Në këtë kuadër, janë ndaluar shefi i Komisariatit të Sarandës, Gëzim Bashllari, së bashku me vartësit e tij Andi Duro, Ajdin Ismailaj dhe Robert Çullaj, ndërsa masa është ekzekutuar nga Agjencia e Mbikëqyrjes Policore.
Operacioni është zhvilluar pas denoncimeve për ndërhyrje dhe punime të paligjshme në lagjen nr. 1 të qytetit bregdetar, ku janë konstatuar disa struktura të ngritura edhe në vijën bregdetare.
Ndërkohë, një grua që dyshohet se administronte hapësirën e plazhit dhe për llogari të së cilës po kryheshin ndërtimet është shpallur në kërkim, ndërsa hetimet vijojnë për të zbardhur plotësisht rrjetin e përfshirë në këtë çështje.