Gjergji Taho, administratori i Paysera Albania drejton edhe Durana Tech Park
Një problem i hershëm të qeverisjes në Shqipëri është rikthyer në vëmendje: kufiri i paqartë mes funksioneve publike dhe interesave private. Gazetari Sokol Bregu ka bërë një akuzë duke vënë në qendër të debatit një figurë që, sipas të dhënave zyrtare, rezulton të mbajë njëkohësisht role drejtuese në subjekte publike dhe të kontrollojë kompani private me peshë të konsiderueshme financiare, duke ngritur dyshime serioze për konflikt interesi.
Bëhet fjalë për Gjergji Tanon, i cili, sipas Sokol Bregut, është kryetari i komisionit për dhënien e licencave për baste. Por, ndodhet në një konflikt të hapur interesi, për shkak të përfshirjes së tij në disa subjekte ekonomike private dhe publike me ndikim të drejtpërdrejtë financiar dhe rregullator.
Sipas deklaratës së Bregut, i njëjti person është administrator i “Durana Tech Park”, ndërkohë që zotëron dhe kontrollon edhe kompani private, përfshirë një nga operatorët më të mëdhenj të shërbimeve të pagesave online në Shqipëri, “Paysera Albania”.
“Kryetari i komisionit të dhënies së licencave për baste është edhe administratori i “Durana Park”. Nuk është vetëm administratori i “Durana Park”. Ka edhe kompaninë e lëvizjes së parave online më të madhe në Shqipëri. I “Paysera Albania”. Është në konflikt të pastër interesi”, tha Sokol Bregu.
Zinxhiri i pronësisë private
Të dhënat zyrtare të Opendata Albania, të nxjerra nga Zoom.al, tregojnë se Gjergji Taho është administrator dhe zotërues 100% i shoqërisë BWB sh.p.k (Best Way to Balkans), e themeluar në vitin 2014. Kjo shoqëri operon në një gamë shumë të gjerë aktivitetesh, nga telekomunikacioni dhe teknologjia e informacionit, te marketingu, publiciteti dhe platformat web.
BWB sh.p.k rezulton gjithashtu shoqëri mëmë e “Paysera Albania”, ku zotëron 80% të kuotave. Paysera Albania është themeluar në vitin 2020 dhe ushtron aktivitet në fushën e shërbimeve të pagesave dhe lëvizjes së parave online. Edhe pse Paysera Albania ka administrator formal një person tjetër, kontrolli ekonomik i saj ushtrohet indirekt nga Gjergji Taho, përmes BWB sh.p.k.
Të dhënat financiare tregojnë se BWB ka realizuar xhiro shumë të larta ndër vite, deri në mbi 8 miliardë lekë në vit, duke e renditur atë ndër shoqëritë private me peshë të konsiderueshme financiare në treg.
Roli në Durana Tech Park, një entitet publik
Paralelisht me aktivitetin privat, Gjergji Taho rezulton administrator i “Durana Tech Park”, një shoqëri aksionare e themeluar në shkurt 2025. Ndryshe nga kompanitë e mësipërme, Durana Tech Park është një entitet me pronësi 100% publike, në varësi të Korporatës së Investimeve Shqiptare, e cila administrohet nga Ministria e Ekonomisë, Kulturës dhe Inovacionit.
Durana Tech Park ka si objekt menaxhimin, ndërtimin dhe operimin e Parkut Teknologjik dhe Shkencor në zonën e Xhafzotajt, Shijak, një projekt strategjik i mbështetur me vendime të posaçme të Këshillit të Ministrave dhe me transferim pasurish shtetërore.
Në këtë shoqëri, Gjergji Taho ushtron funksion administrativ në një strukturë publike, e cila ka detyrime për përputhshmëri ligjore, financiare dhe rregullatore, si dhe rol në përzgjedhjen e përdoruesve dhe partnerëve të parkut.
Thelbi i akuzës për konflikt interesi
Sipas deklaratës publike të Sokol Bregut, problemi nuk qëndron vetëm te shumësia e roleve, por te fakti se i njëjti person kontrollon njëkohësisht:
- kompani private me aktivitet financiar dhe teknologjik,
- një shoqëri pagesash online
Nëse, siç pretendohet, ai ushtron ose ka ushtruar edhe funksion vendimmarrës në komisione shtetërore për licencimin e basteve, atëherë krijohet një ndërthurje e drejtpërdrejtë mes pushtetit rregullator dhe interesave private, çka përbën bazë për konflikt interesi sipas legjislacionit shqiptar.
Çfarë mbetet për t’u sqaruar
Nga të dhënat faktike rezulton qartë se i njëjti person zotëron dhe kontrollon më shumë se një kompani private, si dhe ushtron funksione administrative në një shoqëri publike. Ajo që mbetet për t’u verifikuar nga institucionet përgjegjëse është:
- roli konkret i tij në vendimmarrje publike,
- nëse ka pasur ndikim të drejtpërdrejtë në dhënien e licencave apo autorizimeve,
- dhe nëse këto vendime kanë prekur interesa ku ai ka përfitim ekonomik.
Vetëm një hetim institucional mund të përcaktojë nëse kemi të bëjmë me shkelje ligjore apo me një situatë që, ndonëse formalisht e ligjshme, ngre pikëpyetje serioze mbi etikën dhe transparencën në ushtrimin e funksioneve publike./ Zoom.al