Skifer Ponari kërcënon familjen: Më keni 500 mijë euro borxh, dilni nga shtëpia
Një denoncim i rëndë ka mbërritur pranë autoriteteve dhe mediave, ku një familje shqiptare rrëfen një histori të gjatë kërcënimesh, presioni, marrjeje pasurish me forcë dhe pretendimesh financiare të pambështetura me dokumente legjitime, pasi ka pretendime të forta se janë të falsifikuara ose të marra në presion nën kërcënimin e armës, që sipas tyre daton prej vitit 2014 e vijon deri sot.
Sipas denoncimit, personi i përfshirë identifikohet si Skifer Ponari, i cili prej vitesh ushtron presion të vazhdueshëm ndaj familjes, duke pretenduar një borxh prej 500 mijë eurosh dhe duke kërkuar largimin e tyre nga banesa.
📌 Kërcënimet e fundit
Më 10 shkurt 2026, familjarët deklarojnë se kanë marrë telefonata të vazhdueshme, deri në 3–4 herë brenda minutës, nga Skifer Ponari, i cili kërkonte të fliste me nënën e familjes. Pasi iu komunikua se ajo ndodhej në spital, ai reagoi me fyerje dhe kërcënime, duke pretenduar se familja i ka borxh 500 mijë euro.
Kur iu kërkua të paraqiste akte ligjore, kontrata shitjeje apo prova bankare, ai ka refuzuar, duke deklaruar se “si i ka dhënë paratë, ai e di vetë”, dhe se nuk i detyrohet askujt shpjegime.
Sipas rrëfimit për Maska.al, ai kërcënoi se nëse familja nuk pranonte takim, do të shkonte vetë në banesë.
🏠 Paraqitja në banesë dhe ultimatumet
Po atë mbrëmje, rreth orës 19:00, Ponari është paraqitur te dera e banesës. Ai ka kërkuar të përballej drejtpërdrejt me vajzën e familjes, e cila nuk ka dalë për arsye sigurie. Komunikimi është zhvilluar vetëm me prindërit.
Gjatë këtij takimi, sipas denoncimit, ai ka kërkuar:
dorëzimin e një garazhi, duke pretenduar një tjetër “borxh” prej 5,000 eurosh
firmosjen e menjëhershme të dokumenteve
ka kërcënuar se do të kthehej të nesërmen në orën 09:00 për të firmosur “me dëshirë ose me forcë”
ka deklaruar se familja do të nxirrej nga shtëpia, duke thënë se “shtëpia është e imja”
Familja thekson për Maska.al se nuk ekziston asnjë dokument ligjor që vërteton pronësinë e tij mbi shtëpinë, dyqanin apo garazhin.
📂 Ngjarjet e vitit 2014–2015
Sipas rrëfimit, ngjarjet kanë nisur në vitin 2014, kur prindërit janë detyruar të firmosin dokumente nën kërcënim me armë zjarri.
Firmosjet janë kryer në një zyrë noteriale, ku ndodheshin 4–5 persona të tjerë, të cilët, sipas familjes, mbanin armë zjarri të dukshme dhe ushtronin presion të vazhdueshëm. Fillimisht janë bërë kërcënime ndaj jetës së prindërve dhe më pas ndaj fëmijëve, për t’i detyruar të firmosnin.
Një dokument u paraqit si marrëveshje aksionesh (5% në një kompani), por sipas familjes, në faqet e tjera – të cilat nuk u lanë të lexoheshin – përfshihej një detyrim financiar prej 500 mijë eurosh, i cili më vonë u përdor si bazë për pretendime ligjore.
⚖️ Procesi gjyqësor dhe përmbarimi
Skifer Ponari ka hapur një proces gjyqësor në vitet 2014–2015, duke pretenduar mosshlyerje borxhi. Familja deklaron se:
nuk është njoftuar për seancat gjyqësore
procesi është zhvilluar në mungesë të tyre
pas vendimit, ai ka përfituar të drejtën e përmbarimit
Sipas denoncimit, si pasojë:
është marrë një dyqan, pa akt shitjeje
është marrë një apartament, i kaluar më pas në përdorim të një personi tjetër
është marrë një automjet BMW
janë tërhequr 3,000–4,000 euro nga banka
përmes përmbarimit, prej vitit 2014 deri sot, i mbahet rroga nënës, duke i kaluar nga rreth 500 mijë lekë të vjetra në vetëm 200 mijë lekë
Familja pohon për Maska.al se asnjëherë nuk është informuar zyrtarisht për shumën e saktë të detyrimit apo për kohëzgjatjen e pagesave.
🚨 Denoncimi në polici
Pas kërcënimeve të fundit, familja bën me dije se mbrëmjen e 10 shkurtit 2026 ka bërë denoncim zyrtar në polici, duke kallëzuar kërcënimet, presionin dhe tentativën për marrje të pasurive me forcë. Ata kërkojnë ndërhyrjen e institucioneve për të garantuar sigurinë dhe për të hetuar të gjithë zinxhirin e ngjarjeve.
🔎 Pretendime për ndikim dhe presion
Sipas familjes, ndër vite janë bërë përpjekje të shumta për kallëzim penal, por ato janë bllokuar për shkak të ndikimit, korrupsionit dhe lidhjeve që, sipas tyre, ka pasur personi në fjalë me avokatë, gjyqtarë dhe struktura policore.
⏳ Situata aktuale
Aktualisht, sipas denoncimit, Skifer Ponari vijon të:
kërkojë para ose pasuri
ushtrojë presion për firmosje
kërcënojë me jetë, burg dhe nxjerrje nga banesa
Familja shprehet se jeton në frikë dhe kërkon mbrojtje institucionale dhe hetim të plotë të çështjes.