“Plumbi i Artë”
Henrik Hoxhaj vijon rrëfimin për porositë e dyshuara për vrasje me pagesë, teksa zbardh porosinë e ardhur nga Eldi Dizdari në DUBAI. Episodi i atentatit ndaj biznesmenit Lulzim Masha / “150 mijë euro për djalin, 100 mijë për të atin”
Sipas dëshmisë së Henrik Hoxhajt, porosia për atentatin ndaj Lulzim Mashës i është dhënë nga Nuredin Dumani në Gjilan, Kosovë, ku ky i fundit qëndronte në atë kohë. Fillimisht, objektiv i sulmit ishte djali i Lulzim Mashës, për të cilin pretendohet se ishte ofruar një pagesë prej 150 mijë eurosh. Megjithatë, pasi nuk arritën ta lokalizonin, plani ndryshoi.
Hoxhaj ka deklaruar se, sipas asaj që i ishte thënë, vajza e Lulzim Mashës kishte qenë e fejuar me një nga vëllezërit Dizdari. Pas prishjes së fejesës, thuhet se kishte mbetur një konflikt për çështje pasurore, pasi disa prona apo shuma parash që ishin kaluar në emër të familjes Masha nuk ishin kthyer.
Sipas rrëfimit, arma për atentatin ishte siguruar përmes një personi të njohur me nofkën “Sakati”, me të cilin i kishte lidhur Nuredini. Arma u përdor në momentin e ngjarjes, por sipas dëshmisë, ajo u bllokua gjatë tentativës për të qëlluar. Hoxhaj pretendon se dy ditë para ngjarjes ishin kryer edhe prova me armën.
Duke qenë se nuk arritën të gjenin djalin, grupi vendosi të godiste të atin, me synimin që kjo të detyronte djalin të kthehej nga jashtë vendit. Sipas Hoxhajt, kjo ishte një praktikë që ata ndiqnin në raste të tilla.
Ai ka deklaruar gjithashtu se gjatë atentatit ishte duke ndjekur komunikimet e policisë përmes një radioje që dispononte, ku transmetoheshin përshkrime të autorit të dyshuar, përfshirë veshjen dhe karakteristika fizike.